2021 йилги Кобул аэропортидаги терактга алоқадор афғонистонлик судланди

Чоршанба куни Виржиния штатидаги федерал ҳакамлар ҳайъати афғонистонлик шахсни 2021 йилда Кобул аэропортида содир этилган худкушлик ҳужумига алоқадорликда ҳамда террорчилик ташкилотига моддий ёрдам кўрсатиш учун тил бириктирганликда айбдор деб топди.

Бироқ ҳакамлар ҳайъати унинг ҳаракатлари бевосита ўлимларга сабаб бўлган-бўлмагани борасида бир тўхтамга кела олмади ва бу ноаниқлик айбланувчи Муҳаммад Шарифуллоҳни эҳтимолий умрбод қамоқ жазосидан сақлаб қолди. У 20 йилгача озодликдан маҳрум этилиши мумкин.

АҚШ округ судьяси Энтони Тренга ҳозирча ҳукм ўқиладиган санани белгиламади. Ҳужум 2021 йил 26 август куни, АҚШ кучлари Афғонистондан эвакуация қилинаётган пайтда содир бўлган эди.

“Abbey Gate” дарвозаси олдида худкуш террорчи портловчи моддалар ўрнатилган камзулини ишга тушириши оқибатида 11 нафар денгиз пиёдаси, бир нафар ҳарбий-денгиз кучлари санитари ва бир нафар армия аскари, шунингдек, 160 нафарга яқин афғонистонлик ҳалок бўлди.

Прокурорларнинг таъкидлашича, Шарифуллоҳ “Исломий давлат” гуруҳининг Афғонистондаги бўлинмаси бўлган “ИШИД-Хуросон”га ҳужум олдидан разведка маълумотларини тўплаш ва алоқа ўрнатишга кўмаклашиш орқали ёрдам берган.

Ҳимоячилар фикрича, ҳукумат Федерал Қидирув Бюроси (ФҚБ)  терговлари чоғида Шарифуллоҳ берган кўрсатмаларгагина суяниб қолган ва унинг портлашдаги иштирокини мустақил равишда исботлай олмаган.

Ушбу иш “Abbey Gate” ҳужуми билан боғлиқ АҚШдаги биринчи жиноий суд жараёнидир.

Доналд Трампнинг иккинчи муддати бошида Шарифуллоҳ Покистонда, Афғонистон чегараси яқинида, ФҚБ ва Марказий разведка билан ҳамкорлик қилаётган Покистон хавфсизлик кучлари томонидан қўлга олинди.