Киев урушни тугатиш учун дипломатик саъй-ҳаракатларни кучайтиришга интилмоқда

Зеленский Х ижтимоий тармоғида берган баёнотида Киев Украинадаги тўрт йиллик уруш фонида тинчликка интилаётгани ва можарони тугатиш учун зарур дипломатик ишларни олиб бораётганини айтди.

“Гап нима ҳақида кетаётганига – Москвадаги парад учун бир неча соатлик хавфсизлик таъминотими ёки бундан жиддийроқ нарсами – аниқлик киритамиз. Бизнинг таклифимиз – бу узоқ муддатли сулҳ, одамлар учун ишончли ва кафолатланган хавфсизлик ҳамда мустаҳкам тинчликдир”, – дея таъкидлади у.

Унинг қўшимча қилишича, Украина томони бу йўналишда ҳар қандай муносиб ва самарали шаклда ишлашга тайёр.

Чоршанба куни Россия президенти Владимир Путин Трамп билан телефон орқали мулоқот чоғида Ғалаба куни нишонланиши муносабати билан 9 май куни Украинада ўт очишни тўхтатиш таклифини билдирди.

“Трамп бу ташаббусни фаол қўллаб-қувватлаб, ушбу байрам Иккинчи жаҳон урушида фашизм устидан қозонилган умумий ғалабамизни йодга солишини таъкидлади”, – деди Россия президенти ёрдамчиси Юрий Ушаков.

Айни пайтда Трамп Оқ уйдаги журналистларга телефон суҳбати давомида Путинга “ўт очишни бир оз тўхтатишни таклиф қилганини” ва унинг фикрича, Путин “шундай қилиши мумкинлигини” айтди.