Финляндия Россия таҳдидига қандай тайёргарлик кўрган?

Нашр маълумотларига кўра, Хельсинкида 5500 га яқин ер ости бошпанаси мавжуд бўлиб, улар зарурат туғилганда қарийб 1 миллион кишини ҳимоя қилиш имконига эга. Бутун Финляндия бўйлаб эса 50 мингдан ортиқ бошпана бўлиб, улар мамлакат аҳолисининг 85 фоизини қамраб олиши мумкин.

Финляндияда бошпаналар фақат фавқулодда вазиятлар учун эмас, балки кундалик ҳаётда ҳам фаол ишлатилади. Улар спорт заллари, бассейнлар, сауналар, болалар майдончалари, картинг трассалари, скейт-парклар ва бошқа жамоат объектлари сифатида хизмат қилади.

Қонунчиликка мувофиқ, майдони 1200 квадрат метрдан катта бўлган бинолар ва турар-жой мажмуаларида бошпана бўлиши мажбурий ҳисобланади. Бу тизим Иккинчи жаҳон уруши давридан бери амал қилиб келади ва мунтазам равишда такомиллаштириб борилган.

Материалда Хельсинки марказидаги Мерихака бошпанаси алоҳида мисол сифатида келтирилган. У 6000 кишини сиғдира олади ҳамда портлаш, кимёвий ва биологик таҳдидлар, шунингдек радиациядан ҳимоя қилишга мўлжалланган.

Фавқулодда вазиятда шаҳар бўйлаб сиреналар ишга туширилади ва аҳолига мобил телефонлар орқали огоҳлантириш юборилади. Бошпаналар тинчлик даврида бошқа мақсадларда фойдаланилаётган бўлса ҳам, 72 соат ичида тўлиқ тайёр ҳолатга келтирилиши мумкин.

The Times қайд этишича, Россия билан 1300 километрдан ортиқ чегарага эга Финляндия 2014 йилда Қрим аннексияси ва 2022 йилда Украинадаги урушдан кейин фуқаро муҳофазасига янада катта эътибор қарата бошлаган. 2023 йилда НАТОга қўшилган мамлакатнинг бу тажрибаси ҳозир Европа давлатлари учун намуна сифатида баҳоланмоқда.