Россия Дуровни террорчилар рўйхатига киритди

Рўйхатда Дуров «Жисмоний шахслар» бўлимида 6894-рақам остида қайд этилган. Ёзувда унинг тўлиқ исми, туғилган санаси — 1984 йил 10 октябрь, шунингдек туғилган жойи — Ленинград кўрсатилган.

Рўйхатга киритилганда банклар ҳисоб рақамларини блоклайди, эгасига эса фақат чекланган миқдордаги маблағни ечиш ва сарфлашга рухсат берилади. Росфинмониторингда Дуровнинг рўйхатга киритилиши Telegramнинг ўзи учун ҳеч қандай чекловни келтириб чиқармаслигини маълум қилишди.

Дуров ўзининг русзабон аккаунтида рўйхатга киритилишига мем расми билан муносабат билдирди. Расмда Дуровнинг ўзи «террорчиларга ёрдамчи» деган ёзув билан, шунингдек Россия ташқи ишлар вазири Сергей Лавров қўл сиқаётган «Толибон» вакиллари «ҳурматли ҳамкорлар» деган ёзув билан тасвирланган.

Инглиззабон аккаунтида эса Дуров кейинроқ ёзишича, уни террорчилар реестрига «Telegramда оммавий кузатув ва цензура талабларини бажаришдан бош тортгани учун» киритишган. «Россия қонунларига кўра, менга интернетда бирор нарса чоп этиш тақиқланган. Россиялик амалдорлар кимнинг кимни интернетда тақиқлай олиши борасида аниқ чалкашиб қолишган», — деб таъкидлади у.

ФСБ 29 июль куни Павел Дуровни террорчилик фаолиятига кўмаклашишда айблаётганини эълон қилди, сабаби у махсус хизмат версиясига кўра Россияда террорактлар ва диверсияларни мувофиқлаштириш учун фойдаланиладиган Telegram-канал ва ботларни ўчирмаяпти.