Россия Украинанинг гуманитар ёрдам марказига зарба берди

The Guardian нашри Reuters, Associated Press ва AFP маълумотларига таяниб хабар беришича, ҳалок бўлганлар орасида икки нафар қутқарувчи ва тўрт нафар полиция ходими бор. Яна беш киши шифохонага ётқизилган. Уларнинг икки нафари қутқарувчилар ҳисобланади.

Зеленскийнинг таъкидлашича, дастлаб қишлоқдаги мактаб биносига бомбалар ташланган. Ушбу бинодан таълим мақсадида фойдаланилмаган, у аҳоли учун бошпана ва гуманитар ёрдам тарқатиш маскани вазифасини бажарган. Кейинчалик яқин атрофдаги бошпана ҳам зарбага учраган.

Запорожье шаҳар кенгаши котиби Регина Харченко ҳужумдан сўнг 27 киши бедарак йўқолганини маълум қилган. Қутқарувчилар вайроналар остида қолган одамларни қидириш ишларини давом эттирган. Маҳаллий ҳарбий вакил Михаил Сёмикиннинг айтишича, ҳудудда давом этган дрон ҳужумлари қутқарув ишларини қийинлаштирган.

Украина президенти ҳужумни кескин қоралаб, Россия қўшинлари қишлоқ аҳолиси ушбу жойдан ҳар ҳафта инсонпарварлик ёрдами олишини билган бўлиши кераклигини таъкидлаган.

Ҳужум Россия назорати остидаги Херсон вилоятининг Олешки шаҳрида гуманитар ёрдам етказиш ва аҳолини эвакуация қилиш имконини берган олти кунлик маҳаллий сулҳ якунланганидан бир кун ўтиб содир бўлган. The Guardian маълумотига кўра, ушбу келишув АҚШ биринчи хоними Мелания Трамп воситачилигида амалга оширилган.

Кремль ҳозирча шунга ўхшаш бошқа гуманитар операциялар режалаштирилмаётганини билдирган.

Шу билан бирга, АҚШ махсус вакили Стив Уиткофф Россия ва Украина ўртасидаги музокаралар 10–11 ноябрь кунлари Абу-Дабида давом эттирилишини маълум қилган. АҚШ президенти Дональд Трамп урушни якунлаш бўйича келишувга эришишга интилаётган бўлса-да, ҳозирча сезиларли натижага эришилмаган.

Муаллиф: Ҳасанбой ОЧУН