Трамп Венесуэлани Америкага қўшиб олмоқчи

Президент бу ҳақда «Fox News» мухбири Жон Робертс билан телефон орқали суҳбатда гапирган. Робертс X ижтимоий тармоғидаги постида: «Ҳозиргина Доналд Трамп билан телефонда гаплашдим... у менга Венесуэлани 51-штатга айлантириш ҳаракатини жиддий кўриб чиқаётганини айтди», — деб ёзган.

Трамп 2026 йилги Жаҳон бейсбол мусобақаси давомида Жанубий Америка мамлакати АҚШга қўшилиши мумкинлиги ҳақида бир неча бор гапирган.

У бу таклифни Венесуэла турнир ярим финалида Италияни 4:2 ҳисобида мағлуб этганидан кейин илк бор тилга олиб, «Truth Social» тармоғида: «Сўнгги пайтларда Венесуэлада яхши ишлар бўляпти. Бу қандай сеҳр эканлиги қизиқ? 51-штат, ким қўллайди?» — деб ёзган.

Орадан бир кун ўтиб, Венесуэла финалда АҚШни мағлуб этгач, яна «Штат мақоми!!!», деб пост қолдирган.

Эслатиб ўтамиз, шу йилнинг 3 январ куни эрта тонгда АҚШ ҳарбий операция доирасида Каракасдаги Форт Тиуна ҳарбий мажмуасида Мадуро ва унинг рафиқаси Силия Флоресни қўлга олиб, АҚШга олиб кетганди.

Ҳозирда Мадуро «Metropolitan Detention Center» қамоқхонасида сақланмоқда. Унга қарши наркотерроризм каби бир қатор айбловлар қўйилган.

Трамп президентлигининг иккинчи муддати давомида Гренландия ва Канадани ҳам ўз назоратига олиш билан таҳдид қилган. Январь ойида у тармоқда сунъий интеллект ёрдамида яратилган тасвирни улашган бўлиб, унда АҚШ байроғи Канада, Гренландия ва Венесуэла ҳудудларини қоплаб тургани тасвирланганди.