Туркияда Исроил мудофаасида хизмат қилган аёл ҳибсга олинди

Туркия қонунчилигига кўра, мамлакат фуқароларининг расмий рухсатсиз хорижий давлатлар қуролли кучларида хизмат қилиши тақиқланган ва қонунбузарлик сифатида баҳоланади.

ОАВларда Жессика Баҳар (айрим манбаларда Жессика Бехер) деб келтирилган ушбу аёл Туркияга оиласини кўриш учун келган вақтида қўлга олинган. Туркия расмийлари уни Жиноят кодексининг геноцид жиноятларига алоқадор 76-моддаси доирасида ҳибсга олгани айтилмоқда.

Халқаро оммавий ахборот воситалари тарқатган маълумотларга кўра, дипломатик музокаралар ва ташқи босимлар, жумладан АҚШнинг эҳтимолий аралашувидан кейин аёл озод қилинган.

Маълум қилинишича, у Исроилга депортация қилиниб, хавфсизлик хизмати кузатувида мамлакатдан чиқариб юборилган.

Қатарнинг “The New Arab” нашри хабарига кўра, аёл ҳибсга олинганидан тахминан бир ҳафта ўтиб Туркиядан чиқарилган.

Туркия расмийлари ҳозирча иш бўйича кейинги ҳуқуқий жараёнлар ҳақида батафсил маълумот бермаган.

Ушбу ҳолат иккиёқлама фуқаролик, хорижий армияда хизмат қилиш ва Исроил билан боғлиқ геосиёсий муносабатлар фонида халқаро жамоатчилик эътиборини тортмоқда.