Трамп Ким Чен Ин билан яна учрашадими?

The Economist ёзишича, Кимнинг музокарадаги позицияси аввалгидан анча кучли. Шимолий Корея ҳозир ўнлаб ядро каллакларига ва АҚШ ҳудудигача етиб бориши мумкин бўлган ракеталарга эга. Трамп Шимолий Кореяда 57 та ядро каллаги борлигини айтган, мустақил ҳисоб-китобларда эса уларнинг сони 120 тагача бўлиши мумкинлиги кўрсатилади. Пхеньян йилига яна 10-20 та каллак учун етарли ядро материалини ишлаб чиқариши мумкин.

Бундан ташқари, Россия билан яқинлашув Шимолий Кореяга қўшимча имконият бермоқда. Пхеньян Россияга артиллерия снарядлари, баллистик ракеталар ва қарийб 16 минг аскар юборган. Эвазига Шимолий Корея озиқ-овқат, ёқилғи, маблағ ва замонавий технологияларга эга бўлмоқда. Россиянинг ёрдами туфайли халқаро санкцияларнинг Пхеньянга босими ҳам аввалгидек кучли эмас.

Шу сабабли АҚШ ва Жанубий Кореяда янги ёндашув ҳақида баҳслар кучаймоқда. Сеул Шимолий Кореяни дарҳол ядро қуролидан бутунлай воз кечишга мажбурлаш ўрнига, аввал унинг ядро дастурини музлатишни таклиф қилмоқда. АҚШдаги айрим экспертлар ҳам тўлиқ ядросизлантириш талабидан қурол-яроғни назорат қилиш ва Шимолий Корея арсеналининг янада кенгайишини чеклашга ўтишни таклиф қилмоқда.

Бироқ The Economist бунинг жиддий хавфлари борлигини таъкидлайди. АҚШ Шимолий Кореянинг ядро мақомини амалда тан олса, бу Ким Чен Ин учун катта сиёсий ютуқ бўлади. Бундан ташқари, Япония ва Жанубий Корея ўз хавфсизлигидан хавотирланиб, ўз ядро қуролини яратиш масаласини жиддий кўриб чиқиши мумкин.