Honda электромобилларни симсиз қувватлаш тизимини ишлаб чиқмоқда

Электр юк машиналари учун асосий муаммолардан бири – катта сиғимли батареяларни узоқ вақт давомида қувватлаш зарурати. Айниқса, узоқ масофага қатнайдиган юк машиналари учун қувватлашга кетган вақт ташиш самарадорлигига таъсир этади.

Япониянинг “Honda Motor” (7267.T) автомобил ишлаб чиқарувчи компанияси электромобилларни, жумладан, йирик юк машиналарини ҳам ҳаракатланаётган вақтида симсиз қувватлаш технологиясини ишлаб чиққани ҳамда ушбу технологияни Япония автомагистралида синовдан ўтказишни режалаштираётганини маълум қилди.

Honda берган баёнотга кўра, компания мазкур технологияни Taisei (1801.T) қурилиш компанияси ҳамда йўл қурувчи Taisei Rotec корхонаси билан ҳамкорликда 2027 йил апрелида ёки ундан кейин синаб кўради.

Honda’нинг тадқиқот бўлинмаси ҳамда ушбу икки компания томонидан ишлаб чиқилган тизим йўл қопламасига ўрнатилган қувватлаш мосламаларидан ҳаракатдаги транспорт воситаларига электр энергиясини симсиз узатишга мўлжалланган. Шу орқали қувватлаш учун тўхташлар сонини қисқартириш мақсад қилинган.

Тизим умумий оғирлиги тахминан 20 тоннагача бўлган юк машиналарининг ҳаракатига бардош бериши учун ишлаб чиқилган. Компания кейинги босқичда йирик юк машиналари учун 150 кВтгача қувват узатиш имкониятини ҳам синовдан ўтказмоқчи.

2026 йил охиридан бошлаб махсус синов йўлида тизимнинг узоқ муддатли чидамлилиги, ҳаракатланиш вақтида қувват узатиш самарадорлиги ва электромагнит майдон сизиб чиқишига қарши чоралар текширилади. Компания ушбу технологияни дастлаб логистика соҳасида амалиётга жорий этишни кўзлаган.

Honda муҳандиси қувватлаш тармоғига нисбатан харажатлар қандай бўлишига изоҳ бермади. Шунингдек, бунинг иқтисодий жиҳатдан қанчалик ўзини оқлашини баҳолаш зарурлигини билдирди.