Олий маълумотга эга бўлмаган сохта психологлар жавобгарликка тортиладиган бўлди

Эндиликда психологик сертификатга эга бўлмаган соҳа вакилларига маъмурий жавобгарлик белгиланади. Бу ҳақда Соғлиқни сақлаш вазирлиги (ССВ) матбуот хизмати огоҳлантирди.

Ўзбекистон

23.09.2024, 14:46

Lotinchada

Улашиш:

Oliy maʼlumotga ega boʻlmagan soxta psixologlar javobgarlikka tortiladigan boʻldi

Қайд этилишича, ССВнинг "Аҳолига психологик ёрдам кўрсатиш" тўғрисидаги қонун лойиҳаси сенаторлар томонидан маъқулланган. Унга кўра, аҳолига психологик ёрдам кўрсатишда фақат шу соҳа мутахассислари ҳақли бўлиши керак.

"Бугун сохта психологлар кўпайиб кетди. Улар асосан ижтимоий тармоқлар турли жозибадор эълонлар орқали мижозлар топишга ҳаракат қилмоқда. Бироқ ўз хизматларини таклиф этаётганларнинг ҳаммаси ҳам профессионал ва малакали мутахассислар эмас", деган қонун муҳокамасида Олий Мажлис Сенати аъзоси Хуршид Фозилов.

Шунингдек, Фозилов профессионал психологлар фаолиятини такомиллаштириш ва уларни қўллаб-қувватлаш кераклигига тўхталиб, юқоридаги қонун айни шу мақсадда ишлаб чиқилганини билдирган.

Бундан ташқари, қонунда психологик ёрдам кўрсатувчи субъектлар сифатида давлат органларида, бошқа ташкилотларда ишловчи психологлар ёки ушбу соҳада хусусий тартибда фаолият олиб борувчи юридик шахслар ҳамда якка тартибдаги тадбиркорлар фаолият юритиши мумкинлиги белгиланган.

Қонунга кўра, психологик ёрдам кўрсатиш фаолияти билан шуғулланиш ҳуқуқига психология йўналиши бўйича олий маълумотга эга бўлган шахслар эга бўлиши белгиланмоқда. Агар юқоридаги келтирилган талабга жавоб бермайдиган шахс психологик ёрдам кўрсатса, унга нисбатан жавобгарлик чоралари белгиланиши таъкидланган.

Ўзбекистон

23.09.2024, 14:46

Улашиш:

#ССВ #қонунчилик

мавзуга оид янгиликлар