Омбудсманнинг 2025 йилги фаолияти кўриб чиқилди

Олий Мажлис Қонунчилик палатасида Инсон ҳуқуқлари бўйича вакил (Омбудсман)нинг 2025 йилдаги фаолияти тўғрисидаги ҳисоботи кўриб чиқилди.

У давлат органлари ва мансабдор шахслар томонидан инсон ҳуқуқларига риоя этилиши устидан парламент назоратини амалга оширди.

Йил давомида Омбудсманга жами 26 372 та мурожаат келиб тушди. Энг кўп мурожаатлар Тошкент шаҳри, Қашқадарё ва Жиззах вилоятларидан бўлган.

Мурожаатлар асосида:

• 194 та таъсир чораси кўрилди;
• 118 нафар масъул шахс жавобгарликка тортилди;
• фуқаролар фойдасига 11,8 млрд сўмдан ортиқ маблағ ундирилишига эришилди.

Шунингдек, эркинлиги чекланган шахслар сақланаётган жойларга 954 марта мониторинг ташрифи амалга оширилди. Ёпиқ муассасалар шароитини яхшилаш учун 8,5 млрд сўмдан ортиқ маблағ ажратилди.

Йил давомида 90 та қонун лойиҳаси экспертизадан ўтказилди ва қатор таклифлар берилди. Омбудсман тавсияси билан 11 та норматив ҳужжат қабул қилинди.

Халқаро ҳамкорлик ҳам кенгайди. Жумладан, Россия билан “Йўл харитаси” имзоланди ва унинг натижасида 31 нафар ўзбекистонлик талабага қўлланган маъмурий жазо бекор қилинди.

Депутатлар Омбудсман фаолиятини ижобий баҳоладилар ва тегишли қарор қабул қилдилар.