"Ўзбекистон билан виза тартибини жорий қилиш керак. Мамлакатнинг "фуқаро"лари бизга керак эмас". Россиялик депутат нимага шама қилмоқда?

"Қозондаги Ўзбекистон бош консуллиги ўзбекистонликларни Россия армиясига қўшилмасликка чақирди. Нега улар сизни оналик учун суюнчи пули олмасликка чақирмади? Бошқа имтиёзлардан фойдаланмасликка-чи? Бу мумкин. Лекин сизни боқаётган давлатни ҳимоя қилиш мумкин эмас. Ўзбекистон билан виза тартибини жорий қилиш керак. Бундай "фуқаро"лар бизга керак эмас", дея пост қолдирган Миронов.

Россия депутатининг мазкур постига Ўзбекистон жамоатчилик фаоллари ҳам ижтимоий тармоқлардаги ўзларининг саҳифаларида бирин-кетин жавоб қайтарди. Шулардан Олий Мажлис Қонунчилик палатаси спикерининг ўринбосари, "Миллий тикланиш" демократик партияси раиси Алишер Қодиров ўзбеклардек баракали халқ ҳаққини меҳнат қилиб топади, одам ўлдириб эмас, дея ёзган.

"Ўзбеклардек баракали халқ ҳаққини меҳнат қилиб топади, одам ўлдириб эмас. Россияни эса Мироновнинг ўзи, ўғиллари, куёвлари, неваралари ҳимоя қилиши керак. Билишимча, руслар ҳам ватанни ҳимоя қилишни ўзбеклардагидек муқаддас бурч ҳисоблайдилар", дея пост қолдирган Қодиров.

Экология вазири маслаҳатчиси Расул Кушербоев ҳам россиялик депутатнинг фикрларини муносабатсиз қолдирмади.

"Ўзбекистон дипломатик идораси Ўзбекистон қонунчилигида кўзда тутилган нормаларни ўз фуқароларига эслатгани учун Россиядан виза режими жорий этиш таҳдиди янграётгани, Россия сиёсатчилари Ўзбекистонни ўзларига қарам давлат сифатида кўришини англатмоқда. Афсуски, юқори мартабали сиёсатчининг бу гаплари Россия томони Ўзбекистон билан алоқаларни бузиш учун баҳона қидираётганини кўрсатмоқда", деган Кушербоев.

Шунингдек, у Мироновни Захаровадан сўнг Ўзбекистонга киритилмайдиган шахслар рўйхатига жойлаш кераклигини билдирган.

"Шу ўринда жаноб Мироновга савол: агар Ўзбекистон ўз ҳудудида ишлаётган рус фуқароларини Ўзбекистон манфаати учун қаергадир урушга жўнатганида Россия дипломатик ваколатхоналари индамай туришармиди? Кейин Ўзбекистонда ҳам қарши томонга нисбатан худди шундай виза режими жорий этиш имконияти борлигини унутмаслик керак. Менимча, Ўзбекистон учун номақбул шахслар рўйхатига Захаровадан сўнг ким киритилиши кераклиги кўпчиликка тушунарли бўлган бўлса керак”, дея постини якунлаган Экология вазири маслаҳатчиси.

"Юксалиш” ҳаракати раиси, Олий Мажлис депутати Бобур Бекмуродов ҳам ўзининг Тelegram'даги саҳифасида Сергей Мироновнинг постига муносабат билдирди. Бекмуродов Ўзбекистон фуқаролари бошқа давлатнинг урушларига жалб қилинишига ҳеч қачон рози бўлмайди. Консуллик фуқароларни Ўзбекистонда ноқонуний ҳисобланган ҳаракатлардан ҳимоя қилиши табиий ва адолатли, дея ёзган.

"Биринчидан, биз ватандошларимиз бошқа давлатнинг урушларига жалб қилинишига ҳеч қачон рози бўлмаймиз. Консуллигимиз фуқароларимизни Ўзбекистонда ноқонуний ҳисобланган ҳаракатлардан ҳимоя қилиши табиий ва адолатли. Иккинчидан, ватандошларимиз ўз меҳнатлари билан Россиянинг иқтисодиётига ҳисса қўшяпти. Ижтимоий нафақаларни инсон ҳаётига таҳдид қилувчи ҳаракат билан солиштириш саводсизлик ва аҳмоқликдир", дея ёзган Бобур Бекмуродов.

Бундан ташқари, у россиялик депутатга Ўзбекистон Республикаси билан Россия Федерацияси ўртасидаги "Иттифоқчилик муносабатлари тўғрисида"ги шартноманинг 7-моддасини эслатган.

"Ўзбекистон Республикаси билан Россия Федерацияси ўртасидаги Иттифоқчилик муносабатлари тўғрисида"ги шартноманинг 7-моддасида бир томон фуқаролари ва юридик шахсларининг қонуний ҳуқуқлари ва манфаатларини бошқа томон ҳудудида кафолатлайдиган самарали чоралар кўрадилар. Бизда қонунлар ишлайди. Сизларда ҳам шундай бўлиши керак, ўртоқ Миронов. Бундай тажовузкор риторика фақат икки томонлама муносабатларга салбий таъсир кўрсатади", дея қўшимча қилган Бобур Бекмуродов.

Эслатиб ўтамиз, аввалроқ Россия Ташқи ишлар вазирлиги матбуот котиби Мария Захарова Тошкентдаги мактаб ўқувчиси рус тили дарсида ўқитувчиси томонидан калтаклангани бўйича Ўзбекистондан изоҳ талаб қилган эди. 

Жавоҳир Йўлдашов