"Oʻzbekiston bilan viza tartibini joriy qilish kerak. Mamlakatning "fuqaro"lari bizga kerak emas". Rossiyalik deputat nimaga shama qilmoqda?

"Qozondagi Oʻzbekiston bosh konsulligi oʻzbekistonliklarni Rossiya armiyasiga qoʻshilmaslikka chaqirdi. Nega ular sizni onalik uchun suyunchi puli olmaslikka chaqirmadi? Boshqa imtiyozlardan foydalanmaslikka-chi? Bu mumkin. Lekin sizni boqayotgan davlatni himoya qilish mumkin emas. Oʻzbekiston bilan viza tartibini joriy qilish kerak. Bunday "fuqaro"lar bizga kerak emas", deya post qoldirgan Mironov.

Rossiya deputatining mazkur postiga Oʻzbekiston jamoatchilik faollari ham ijtimoiy tarmoqlardagi oʻzlarining sahifalarida birin-ketin javob qaytardi. Shulardan Oliy Majlis Qonunchilik palatasi spikerining oʻrinbosari, "Milliy tiklanish" demokratik partiyasi raisi Alisher Qodirov oʻzbeklardek barakali xalq haqqini mehnat qilib topadi, odam oʻldirib emas, deya yozgan.

"Oʻzbeklardek barakali xalq haqqini mehnat qilib topadi, odam oʻldirib emas. Rossiyani esa Mironovning oʻzi, oʻgʻillari, kuyovlari, nevaralari himoya qilishi kerak. Bilishimcha, ruslar ham vatanni himoya qilishni oʻzbeklardagidek muqaddas burch hisoblaydilar", deya post qoldirgan Qodirov.

Ekologiya vaziri maslahatchisi Rasul Kusherboyev ham rossiyalik deputatning fikrlarini munosabatsiz qoldirmadi.

"Oʻzbekiston diplomatik idorasi Oʻzbekiston qonunchiligida koʻzda tutilgan normalarni oʻz fuqarolariga eslatgani uchun Rossiyadan viza rejimi joriy etish tahdidi yangrayotgani, Rossiya siyosatchilari Oʻzbekistonni oʻzlariga qaram davlat sifatida koʻrishini anglatmoqda. Afsuski, yuqori martabali siyosatchining bu gaplari Rossiya tomoni Oʻzbekiston bilan aloqalarni buzish uchun bahona qidirayotganini koʻrsatmoqda", degan Kusherboyev.

Shuningdek, u Mironovni Zaxarovadan soʻng Oʻzbekistonga kiritilmaydigan shaxslar roʻyxatiga joylash kerakligini bildirgan.

"Shu oʻrinda janob Mironovga savol: agar Oʻzbekiston oʻz hududida ishlayotgan rus fuqarolarini Oʻzbekiston manfaati uchun qayergadir urushga joʻnatganida Rossiya diplomatik vakolatxonalari indamay turisharmidi? Keyin Oʻzbekistonda ham qarshi tomonga nisbatan xuddi shunday viza rejimi joriy etish imkoniyati borligini unutmaslik kerak. Menimcha, Oʻzbekiston uchun nomaqbul shaxslar roʻyxatiga Zaxarovadan soʻng kim kiritilishi kerakligi koʻpchilikka tushunarli boʻlgan boʻlsa kerak”, deya postini yakunlagan Ekologiya vaziri maslahatchisi.

"Yuksalish” harakati raisi, Oliy Majlis deputati Bobur Bekmurodov ham oʻzining Telegram'dagi sahifasida Sergey Mironovning postiga munosabat bildirdi. Bekmurodov Oʻzbekiston fuqarolari boshqa davlatning urushlariga jalb qilinishiga hech qachon rozi boʻlmaydi. Konsullik fuqarolarni Oʻzbekistonda noqonuniy hisoblangan harakatlardan himoya qilishi tabiiy va adolatli, deya yozgan.

"Birinchidan, biz vatandoshlarimiz boshqa davlatning urushlariga jalb qilinishiga hech qachon rozi boʻlmaymiz. Konsulligimiz fuqarolarimizni Oʻzbekistonda noqonuniy hisoblangan harakatlardan himoya qilishi tabiiy va adolatli. Ikkinchidan, vatandoshlarimiz oʻz mehnatlari bilan Rossiyaning iqtisodiyotiga hissa qoʻshyapti. Ijtimoiy nafaqalarni inson hayotiga tahdid qiluvchi harakat bilan solishtirish savodsizlik va ahmoqlikdir", deya yozgan Bobur Bekmurodov.

Bundan tashqari, u rossiyalik deputatga Oʻzbekiston Respublikasi bilan Rossiya Federatsiyasi oʻrtasidagi "Ittifoqchilik munosabatlari toʻgʻrisida"gi shartnomaning 7-moddasini eslatgan.

"Oʻzbekiston Respublikasi bilan Rossiya Federatsiyasi oʻrtasidagi Ittifoqchilik munosabatlari toʻgʻrisida"gi shartnomaning 7-moddasida bir tomon fuqarolari va yuridik shaxslarining qonuniy huquqlari va manfaatlarini boshqa tomon hududida kafolatlaydigan samarali choralar koʻradilar. Bizda qonunlar ishlaydi. Sizlarda ham shunday boʻlishi kerak, oʻrtoq Mironov. Bunday tajovuzkor ritorika faqat ikki tomonlama munosabatlarga salbiy taʼsir koʻrsatadi", deya qoʻshimcha qilgan Bobur Bekmurodov.

Eslatib oʻtamiz, avvalroq Rossiya Tashqi ishlar vazirligi matbuot kotibi Mariya Zaxarova Toshkentdagi maktab oʻquvchisi rus tili darsida oʻqituvchisi tomonidan kaltaklangani boʻyicha Oʻzbekistondan izoh talab qilgan edi. 

Javohir Yoʻldashov