Ўзбекистон ва Human Rights Watch Варшавадаги конференцияда инсон ҳуқуқлари бўйича мажбуриятларни бажариш масаласини муҳокама қилди

13 октябрь куни Варшава шаҳрида Олий Мажлиснинг инсон ҳуқуқлари бўйича вакили (омбудсман) Феруза Эшматова Халқаро инсон ҳуқуқларини ҳимоя қилиш ташкилоти — Human Rights Watch (HRW)’нинг Марказий Осиё бўйича катта таҳлилчиси Мира Риттман билан учрашди. Суҳбат ЕХҲТнинг инсон ўлчами бўйича халқаро анжумани — «Warsaw Human Dimension Conference 2025» доирасида бўлиб ўтди.

Омбудсман аппарати маълумотига кўра, учрашувда томонлар Ўзбекистоннинг инсон ҳуқуқларини таъминлаш борасидаги мажбуриятларини муҳокама қилди, жумладан, БМТнинг соҳавий қўмиталари тавсияларини амалга ошириш масаласи кўриб чиқилди. Шунингдек, давлат тузилмалари ва инсон ҳуқуқлари ташкилотлари ўртасида ҳамкорликни ривожлантириш, маълумот алмашиш ва мулоқотни мустаҳкамлаш аҳамиятига урғу берилди.

Human Rights Watch аввалроқ Ўзбекистонда сўз эркинлигига босим кучайганидан ташвиш билдирганди. Хусусан, ташкилот интернетдаги чиқишлар — президент ва унинг оиласига нисбатан танқид учун фуқароларни таъқиб қилиш ҳолатларининг кўпайганини қайд этган. HRW маълумотларига кўра, 2024 йилда мамлакат судларида шундай бир нечта иш кўриб чиқилган, бу эса экспертлар фикрича, халқаро инсон ҳуқуқлари меъёрларига зид ҳолат ҳисобланади.