Россиядан 30 нафар бола Ўзбекистонга олиб келинмоқда

Ички ишлар, Соғлиқни сақлаш вазирликлари ходимларидан иборат ишчи гуруҳ ота-онаси қарамоғидан маҳрум бўлган болаларни Ташқи ишлар вазирлиги кўмагида Тошкентга қайтариш мақсадида Россия Федерациясига жўнаб кетган. 

Қайд этилишича, ҳозирда Москва, Санкт-Петербург, Астрахан, Волгоград, Иркутск, Челябинск, Владивосток ва Уляновск шаҳарларида, шунингдек, Москва, Ленинград, Орёл, Смоленск ва Владимир вилоятларида ота-она қарамоғидан маҳрум бўлган 30 нафар боланинг ҳужжатларини расмийлаштириш ишларини олиб борилмоқда. 

Шунингдек, вояга етмаган болаларнинг доимий рўйхатдан ўтган жойидаги "Инсон" ижтимоий хизматлар марказлари томонидан олиб келинаётган болаларни оилавий муҳитга қайтариш бўйича чора-тадбирлар кўрилмоқда. Режага асосида:

— 23 нафар вояга етмаган бола ота-онасига топширилади,
— 5 нафар бола қариндошларининг васийлигига берилади,
— 2 нафари муқобил жойлаштириш шаклларига ўтказилади.

Маълумот ўрнида, йил бошидан бери хорижда ота-она қарамоғидан маҳрум бўлган 10 нафар бола ватанга қайтарилган.