Трампнинг “Озодлик лойиҳаси” – бу боши берк кўча лойиҳасидир - Аббос Ароқчи

Эрон ташқи ишлар вазири Аббос Ароқчи АҚШнинг “Озодлик лойиҳаси” деб аталган режаси доирасида Ҳормуз бўғозига аралашиш ниятини қоралаб, бу ташаббус кескинликни янада кучайтириши ва Вашингтонни навбатдаги минтақавий боши берк кўчага олиб кириши ҳақида огоҳлантирди.

“Ҳормуздаги воқеалар сиёсий инқирознинг ҳарбий ечими йўқлигини яққол кўрсатиб турибди”, - деди Ароқчи Х платформасида.

Унинг сўзларига кўра, Покистоннинг хайрихоҳ саъй-ҳаракатлари туфайли музокаралар олдинга силжиётган бир пайтда, Қўшма Штатлар ёмон ниятли кимсалар томонидан яна ботқоққа тортилишдан эҳтиёт бўлиши керак. Бу БААга ҳам тегишли.

Душанба куни Эрон Хотам ал-Анбиё марказий штаби қўмондони генерал-майор Али Абдуллоҳий ҳар қандай хорижий ҳарбий куч, хусусан, АҚШ кучлари Ҳормуз бўғозига яқинлашишга ёки унга киришга уринса, ҳужумга учрашидан огоҳлантирди.

“Биз Ҳормуз бўғози хавфсизлигини бор имкониятларимиз билан таъминлаймиз ва қатъий назорат қиламиз. Барча тижорат кемалари ва нефть танкерларини хавфсизликлари таҳдид остида қолмаслиги учун ушбу ҳудудда жойлашган (Эрон) Қуролли Кучлари билан келишмаган ҳолда Ҳормуз бўғозидан ўтишга уринишдан тийилишга чақирамиз”, – деб баёнот берди юқори мартабали генерал.

Аввалроқ Трамп Вашингтон Ҳормуз бўғозида қолиб кетган хорижий кемаларга ёрдам бериш учун денгиз операциясини бошлашини эълон қилди. Бу қадам минтақада давом этаётган кескинлик фонида гуманитар ташаббус сифатида тақдим этилган.

Трамп жабр кўрган кемаларнинг аксарияти ҳозирги урушда иштирок этмаётган мамлакатларга тегишли эканини таъкидлаб, уларни инқирозга юз тутган “бетараф ва бегуноҳ кузатувчилар” дея таърифлади.