АҚШ Россияга нисбатан санкцияларни юмшатди

Қўшма Штатлар Молия вазири Скотт Бессентнинг маълум қилишича, учинчи давлатларга 12 мартгача танкерларга юкланган ва ҳозирда денгизда бўлган Россия нефти ҳамда нефт маҳсулотларини сотиб олишга рухсат берилди. Бу рухсат бир ой, 12 апрелгача амал қилади. 
 
"Бу қисқа муддатли чора. У Россия ҳукуматига катта молиявий фойда келтирмайди, чунки унинг энергия ресурсларидан асосий даромади қазиб олиш жойида ундириладиган солиқлар орқали шаклланади", — деди Бессент. 
 
13 март ҳолатига кўра денгизда тахминан 124 миллион баррел Россия нефти бор, дея хабар бермоқда Fox News.
 
Ҳурмуз бўғози блокадаси туфайли юзага келаётган кунлик йўқотишларни ҳисобга олганда, Вашингтон томонидан ушбу нефтни сотиб олишга берилган рухсат жаҳон бозори эҳтиёжини атиги беш–олти кунга қоплаши мумкин.