Россия 9 майга “жиддий бўлмаган” сулҳ эълон қилди

Душанба куни Россия 8-9 май саналарида Украина билан бир томонлама сулҳ эълон қилди.

Бунга жавобан Украина 5-6 май кунлари ўз сулҳини эълон қилиб, Россиянинг ҳарбий байрами вақтида ўт очишни тўхтатишни кутиш “жиддий эмас”лигини таъкидлади.

Икки томон ўртасидаги бу келишмовчилик Вашингтон эътиборини Яқин Шарқдаги можарога қаратаётгани сабабли АҚШ бошчилигидаги урушни тугатишга қаратилган дипломатик саъй-ҳаракатлар сусайган бир пайтга тўғри келмоқда.

“Россия Қуролли кучлари Олий Бош қўмондони Владимир Путиннинг қарорига мувофиқ, 2026 йилнинг 8–9 май кунлари ўт очишни тўхтатиш режими эълон қилинди… Умид қиламизки, Украина томони ҳам бунга амал қилади”, — дейилади Россия Мудофаа вазирлигининг МАХ платформасида эълон қилган хабарида.

“Агар Киев режими Улуғ Ватан урушидаги Ғалабанинг 81 йиллиги нишонланишини барбод қилишга қаратилган ўзининг жиноий режаларини амалга оширишга уринса, Россия Қуролли Кучлари Киев марказига жавобан оммавий ракета зарбасини беради”, – дея қўшимча қилинган хабарда. – “Биз Киевнинг тинч аҳолиси ҳамда хорижий дипломатик ваколатхоналар ходимларини шаҳарни зудлик билан тарк этиш зарурлиги ҳақида огоҳлантирамиз”.

Украина Президенти Володимир Зеленский душанба куни байрамни нишонлаши учун Москванинг сулҳ таклиф қилиши "жиддий эмас"лигини ҳамда Россия Украина дронлари “Қизил майдон устида ғувуллаб учиши”дан қўрқаётганини айтди.

“Бугунги кунга қадар Россия ижтимоий тармоқларида даъво қилинаётган ҳарбий ҳаракатларни тўхтатиш тартиби бўйича Украинага ҳеч қандай расмий мурожаат бўлмади”, – деди Зеленский Хъдаги постида.

“Шу муносабат билан биз 5 майдан 6 майга ўтар кечаси соат 00:00 дан ўт очишни тўхтатиш режимини эълон қиламиз. Бу вақтга қадар қолган муддатда сулҳнинг кучга киришини таъминлаш мумкин”, – дея қўшимча қилди у.

Кейинроқ Украина раҳбари “хавфсизлик соҳасидаги ҳамкорлик” бўйича музокаралар ўтказиш учун Кўрфаз давлати Баҳрайнга келиб қўнган.

Украина расмийларининг хабар беришича, душанба куни Россиянинг Украина бўйлаб берган зарбалари оқибатида камида тўққиз киши ҳалок бўлган.

Душанба куни Россиянинг Украинанинг иккинчи йирик шаҳри бўлмиш Харков яқинидаги Мерефа шаҳрига баллистик ракета билан ҳужум қилиши натижасида етти нафар тинч аҳоли вакили ҳалок бўлди ва ўнлаб одамлар яраланди, деб маълум қилди вилоят ҳокимияти.

AFP нашри журналистлари Мерефа кўчаларида адёл ва оқ чойшаблар билан ёпилган, сочилиб ётган бир нечта жасадни кўрганлар; ҳужумдан дўконлар, уйлар ва машиналар ҳам зарар кўрган.