ҚҚС билан боғлиқ йирик фирибгарлик фош этилди

Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан қўшилган қиймат солиғига оид коррупциявий ҳолат аниқланди.

Маълум бўлишича, аввал солиқ идораларида ишлаган, ҳозирда Тошкент шаҳридаги транспорт ва логистика хизматлари кўрсатувчи МЧЖда ҳисобчи бўлиб ишлаётган шахс бўёқ маҳсулотлари ишлаб чиқарувчи МЧЖга 17 млрд сўмлик ҚҚСнинг манфий фарқ суммасини қайтариш ва унинг тўхтатилган гувоҳномасини қайта фаоллаштириш учун 35 минг АҚШ доллари пора талаб қилган.

Тезкор тадбирда у МЧЖ таъсисчисидан 20 500 АҚШ доллари олган пайтда ашёвий далиллар билан ушланди.

Ҳолат юзасидан ҳисобчи ва бошқаларга нисбатан Жиноят кодексининг 168-моддаси 4-қисми «а» банди ҳамда 28,211-моддаси 3-қисми «а» банди билан жиноят иши қўзғатилди.

Дастлабки тергов жараёнида мазкур маблағни ҳал этишда Солиқ қўмитасининг катта инспектори ҳам иштирок этгани маълум бўлиб, у ҳам гумонланувчи сифатида жиноят ишига жалб этилди.