Исроил Ливанга яна зарбалар берди

Аммо Ливан армияси бугун, 17 апрель тонгида Исроил оташкесим кучга кирганидан сўнг уни бузганини, жумладан, мамлакат жанубидаги бир қанча қишлоқларни ўққа тутганини айтди. Исроил ҳозирча бу даъволарга изоҳ бермади.

“Ҳизбуллоҳ” пайшанба куни баёнот бериб, гуруҳ сўнгги ҳужумини маҳаллий вақт билан соат 23:50 да – ўт очишни тўхтатиш кучга киришидан атиги 10 дақиқа олдин амалга оширганини маълум қилган.

Кейинроқ ижтимоий тармоқларда Трампнинг “Ҳизбуллоҳ”га қаратилган ўт очишни тўхтатишга амал қилиш ҳақидаги чақириғи пайдо бўлди.

Исроил бош вазири Бинямин Нетаняху Ливан билан тинчлик ўрнатиш учун ўт очишни тўхтатишга рози бўлганини, бироқ Исроил қўшинлари Ливан ҳудудидаги "хавфсизлик зонаси"дан чиқиб кетмаслигини айтди.

Ливан Бош вазири Навоф Салом сулҳни олқишлаб, уни “урушнинг биринчи кунидан бери илгари суриб келаётган Ливаннинг асосий талаби” ҳамда сешанба куни АҚШда Ливан ва Исроил расмийлари ўртасида бўлиб ўтган учрашувнинг бош мақсади деб атади.

Шунингдек, Трамп Исроил ва Ливан етакчиларини 1983 йилдан буён илк марта икки мамлакат ўртасида мазмунли музокаралар ўтказиш учун Оқ уйга таклиф қилди.

Эрон Ташқи ишлар вазирлиги ўт очишни тўхтатиш ҳақидаги хабарни олқишлаб, сулҳни АҚШ билан минтақавий урушни тўхтатиб туриш бўйича кенгроқ келишувнинг бир қисми сифатида таърифлади.

Қатар, Иордания ва Баҳрайн ҳам Исроил ва Ливан ўртасидаги ҳарбий ҳаракатлар тўхтатилганини маъқуллаб баёнот беришди.

Исроил ва “Ҳизбуллоҳ” ўртасидаги жанговар ҳаракатлар 2 мартда бошланган эди.