Ҳиндистон фуқаролари бошқа давлатлар визаси билан Ўзбекистонга 30 кунгача визасиз кира олади

Президентнинг 2026 йил 29 августдаги ПФ–180-сон фармонига кўра, Ҳиндистон фуқароларида Австралия, АҚШ, Буюк Британия, Канада, Жанубий Корея, Шенген келишувига аъзо давлатлар, Янги Зеландия ёки Япониянинг амалдаги кўп марталик бизнес ёки туристик визаси бўлиши керак.

Шунингдек, улар Ўзбекистондан ўз мамлакатига ёки учинчи давлатга учиш учун авиачипта тақдим этиши лозим.

Янги тартибга кўра, визасиз қолиш муддати хорижий визанинг амал қилиш даври доирасида Ўзбекистонга кирган кундан бошлаб 30 кунгача бўлиши мумкин.

Ҳиндистондан сайёҳлар оқими ошиши кутилмоқда

Ўзбекистон ва Ҳиндистон ўртасида туризм соҳасидаги ҳамкорликни кенгайтириш бўйича 2026–2028 йилларга мўлжалланган дастур имзоланган. Унда икки давлат ўртасида туристик алмашинувни ошириш ва янги қўшма туристик йўналишларни йўлга қўйиш режалари қайд этилган.

Шунингдек, икки давлат фуқаролари учун 30 кунлик визасиз режим жорий этилиши туризм оқимини оширишнинг муҳим омили бўлиши кутилмоқда.

Маълумотларга кўра, Ҳиндистондан Ўзбекистонга кириб келган туристлар сони сўнгги йилларда сезиларли ўсган. 2023 йилда 45,5 минг нафарни ташкил этган кўрсаткич 2024 йилда 70,6 минг нафарга, 2025 йилда эса 80,9 минг нафарга етган.

Ўзбекистон Туризм қўмитаси раҳбари Абдулазиз Аккулов аввалроқ Ҳиндистондан сайёҳлар оқимини янада ошириш, хусусан, болали оилаларни жалб қилишга эътибор қаратилишини билдирган.

Янги тартиб Ҳиндистондан Ўзбекистонга саёҳат қилишни режалаштираётган айрим фуқаролар учун виза расмийлаштириш жараёнини сезиларли даражада енгиллаштиради.