Ўзбекистонлик собиқ амалдорнинг ўғли Дубайда 8 млн. долларлик мулкка эгалик қилиши маълум бўлди

Ўзбекистон ҳукумати томонидан Рашид Қодировнинг ўғли Алишер Қодировга нисбатан  ЖК 165-м. 2-қисм а-банди (такроран ёки хавфли рецидивист томонидан товламачилик), 3-қисм а-бандлари (жуда кўп миқдорда товламачилик) ва 168-м. 3-қисм а-банди (кўп миқдорда фирибгарлик), 4-қисм а-банди (жуда кўп миқдорда фирибгарлик) содир этганликда айбланиб халқаро қидирув эълон қилинган.

2018 йил 22 февралда эса Ўзбекистоннинг собиқ прокурори Рашиқ Қодиров ҳибсга олинган эди.  Бу ҳолат ҳақида Президент Шавкат Мирзиёев 2018 йилда Андижонга қилган ташрифида шундай фикр билдирган.

«Мана, Рашид Қодиров гуруҳи билан қамоқда ўтирибди. Миллион-миллион долларларни қайтаряпти. 2-3 ойдан кейин унинг ўзи телевидение орқали барчани қандай порахўр қилганини айтиб беради. Ҳар бир туман прокуроридан 30-40 минг АҚШ доллари олган. Ҳозир у барчасини қайтаряпти. Биргина ўғли миллиардер. Бошқа ташкилотлар раҳбарлари ҳам, МХХ (ҳозирги ДХХ)нинг 5 собиқ ўринбосарлари ҳам қамоқда. Уларнинг ҳаммаси ўғри. Қандай бўлмасин, мен ҳаммасини жойига қўяман.

Уларнинг ҳаммаси Болтиқбўйида уйлар қурган. Ҳатто Амир Темур бунақа уйларда яшамаган. Бу кимнинг пуллари – халқники. Шу боисдан ҳам прокуратурада 70 фоиз ходим алмашди. Мен ҳаммани кечираман, аммо ўғри ва хоинларни кечирмайман. Мана шуни халқим билиши керак», - деган эди Президент.

«Давлат сирлари тўғрисида»ги қонун талабларига мувофиқ, Рашид Қодировга нисбатан суд жараёни ёпиқ тарзда ўтказилиб, 6 ойга яқин вақт давом этган. Суд тергови жараёнида барча судланувчиларнинг кўрсатмалари текширилган, 200 га яқин гувоҳларнинг кўрсатувлари тингланиб, иш бўйича ўтказилган экспертиза ва хизмат текширувлари хулосалари, шунингдек, жиноят ишида тўпланган далиллар, уларнинг қонунийлиги ва асослилиги нуқтаи назаридан тафтиш қилинган.

Собиқ прокурорга суд ҳукми билан 10 йил озодликдан маҳрум қилиш ва энг кам ойлик иш ҳақининг 500 баравари миқдорида жарима жазоси тайинланган эди. Шунингдек, Рашид Қодиров 2014 йилда собиқ президент Ислом Каримовнинг қизи Гулнора Каримовага нисбатан айблов эълон қилинганда масъул прокурор бўлган.

Маълумотларга кўра, Алишер Қодировнинг Марина Плаза мажмуасида 4 та офиси бор, уларнинг қиймати  1,9 миллион доллардан 2 миллион долларгача ҳисобланади.