Колумбияда уюштирилган теракт оқибатида 19 киши ҳалок бўлди

Шанба куни нотинч ҳисобланган жануби-ғарбий Каука департаментидан ўтувчи Панамерика трассасида содир бўлган портлашда автобуслар ва фургонлар яроқсиз ҳолга келди.

Портлаш кучи бир нечта машинани ағдариб юборди ва йўлнинг қатнов қисмида катта ўра ҳосил қилди.

Шанба оқшомида департамент губернатори 14 киши ҳалок бўлгани ва 38 дан ортиқ одам жароҳатланганини маълум қилган бўлса-да, якшанба куни эрталаб Суд-тиббий экспертиза ва криминалистика миллий институти 19 та жасадни текширишни бошлаганини хабар қилди.

Ҳарбий қўмондон Уго Лопес шанба куни ўтказилган матбуот анжуманида маълум қилишича, ҳужумчилар автобус ва бошқа транспорт воситаси билан йўлни тўсиб, ҳаракатни тўхтатганидан сўнг бомба портлатилган.

Ҳужум сайловчилар президент Густаво Петронинг ворисини сайлайдиган умуммиллий сайловлардан бир ой олдинроқ содир этилди.

Петро ушбу портлашда Жанубий Америка мамлакатининг энг ашаддий жиноятчиси Иван Мордискони айблади ва уни марҳум кокаин қироли Пабло Эскобарга қиёслади.

Сўнгги икки кун ичида икки департаментда 26 та ҳужум қайд этилган. Расмийлар бу ҳудудлардаги ҳарбийлар ва полиция сафини кучайтирган, деди Мудофаа вазири Педро Санчес.

Хавфсизлик – 31 май куни бўлиб ўтадиган президентлик сайловининг асосий масалаларидан биридир. Сиёсий зўравонлик ўтган йилнинг июнь ойида, президентлик пойгасида етакчилик қилаётган ёш консерватор номзод Мигел Урибе Турбай пойтахт Богота шаҳрида сайловолди ташвиқоти пайтида отиб кетилгач, диққат марказига чиқди.

Петронинг қуролли гуруҳлар билан музокара ўтказиш борасидаги баҳсли сиёсати ташаббускори, сўлчи сенатор Иван Сепеда эса сўровномаларда пешқадамлик қилмоқда.

Унинг ортидан исёнчи гуруҳларга қарши кескин курашишга ваъда берган ўнг қанот номзодлари Абелардо де ла Эсприэлла ва Палома Валенсия келмоқда.

Ҳар учала номзод ҳам ўлим билан таҳдид қилингани ва кучайтирилган хавфсизлик чоралари остида сайловолди ташвиқотини олиб бораётганини маълум қилган.