Россия жанг майдонида ғалаба қозонмоқда ва “террорчилар” билан музокара ўтказмайди – Путин

2 сентябр куни президент Путин сўнгги ҳафталардаги Украинанинг Россия ҳудудига қилган ҳужумлари жиддий зарар етказганини, дронлар катта муаммо туғдираётганини қайд этди.

Бироқ у журналистларга, Россия жанг майдонида олдинга силжиётганини айтиб, "Душман тор-мор бўлишига шубҳам йўқ", деди.

Аммо бунга қачон эришиш мумкинлигини айтмади. Россия янги ҳарбий сафарбарлик эълон қилишга мажбурлиги ҳақидаги миш-мишларни эса “сафсата” деб атади Путин.

“Россия илгариламоқда”

Уруш бошланганига тўрт ярим йил тўлди. Россия Украина ҳудудининг қарийб бешдан бир қисмини назорат қилмоқда. АҚШ воситачилигидаги тинчлик музокаралари АҚШ ва Исроил Эрон билан урушга киришганидан сўнг, феврал ойида тўхтаб қолди.

Жамоатчилик фикри сўровлари Россияда урушдан чарчаш кучайиб бораётганини кўрсатмоқда. Нуфузли шахслар эса Россия иқтисодиётига тушаётган босим ҳақида огоҳлантирмоқда.

Бироқ Путиннинг сўзларига кўра, августда рус қўшинлари Донецк вилоятида 270 квадрат километр ҳудудни эгаллаган. Шунингдек, Украина қўшинларининг бири 4 500–4 800 нафар, иккинчиси эса 2 000 нафаргача аскардан иборат икки йирик гуруҳи қуршаб олинган. Аммо бу ҳодисалар халқаро ОАВларида тасдиқланмаган.

Путин Володимир Зеленскийнинг украин дронлари Россия ҳаво ҳудудини амалда ёпиб қўйиши ҳақидаги авиакомпанияларга қилган огоҳлантириши “давлат терроризми”га ўхшашини, агар шундай бўлса, Москва бунга жавоб қайтариш йўлини топишини билдирди. Қирғизистондаги саммитдан кейин матбуот анжуманида сўзлаган Путин “террорчилар” билан музокара олиб боришнинг имкони йўқлигини айтди.

Путин Москва урушни музлатиб қўйиш эмас, балки уни тугатишга қаратилган музокараларга очиқ эканини ва АҚШ президенти Дональд Трампнинг вакиллари билан музокара олиб боришга тайёрлигини яна бир бор таъкидлади.

Путин украин дронлари Россия нефтьни қайта ишлаш заводларига зарар етказганини тан олди, бироқ бу ҳужумлар натижасида юзага келган кенг кўламли ёқилғи тақчиллигини тилга олмади.

Бироқ унинг айтишича, нефтьни қайта ишлаш заводларини ҳимоя қилиш яхшиланган ва атиги 10 фоиз таъмирланиши керак бўлган заводлар қолган.