FIFA раҳбари Инфантино жаҳон чемпионати чипталари нархини ҳимоя қилди

FIFA президенти Жанни Инфантино Жаҳон чемпионати чипталари нархини ҳимоя қилиб, АҚШдаги чипталарни номинал қийматидан минглаб доллар қимматроққа қайта сотишга рухсат берувчи қонунлардан фойдаланишга мажбур эканлигини таъкидлади.

ФИФА Жаҳон чемпионати чипталари нархи юзасидан кескин танқидларга учради. Жумладан, “Football Supporters Europe” (FSE) номли футбол ишқибозлари ташкилоти нарх сиёсатини “товламачилик” ва “катта хиёнат” деб атади.

Ўтган ҳафта FIFAнинг Жаҳон чемпионати чипталарини қайта сотишга мўлжалланган “FIFA Marketplace” веб-сайтида 19 июль куни Ню-Ёркда бўлиб ўтадиган финал ўйинига нархи 2 миллион доллардан ошадиган тўртта чипта сотувга қўйилгани эълон қилинди.

“Агар айримлар финал чипталарини қайта сотиш бозорига 2 миллион доллардан қўйган бўлса,  биринчидан, бу чипталарнинг асл нархи 2 миллион доллар дегани эмас”, — деди Инфантино.

“Иккинчидан, бу чипталарни кимдир сотиб олишини ҳам англатмайди. Борди-ю кимдир финалга 2 миллион долларга чипта сотиб олса, у ажойиб таассуротлар олишига ишонч ҳосил қилиш учун шахсан ўзим унга ҳот-дог ва кола олиб келаман”.

Бу ёзги чипталар нархлари 2022 йилда Қатарда бўлиб ўтган Жаҳон чемпионати нархлари билан солиштирилди.

2022-йилги финалнинг энг қиммат чиптаси номинал қийматда тахминан 1600 доллар турган бўлса, 2026-йилги финалнинг энг қиммат чиптаси дастлабки нархда қарийб 11 000 долларни ташкил этади.

Инфантино чипталарнинг номинал қиймати кескин оширилганини асосли деб қатъий таъкидлади.

У АҚШ дунёдаги кўнгилочар соҳа энг ривожланган бозорга эгалиги, шу сабабли, бозор нархларини қўллаш лозимлигини таъкидлади.

“АҚШда чипталарни қайта сотишга ҳам рухсат берилган. Демак, агар чипталарни жуда арзон сотсангиз, улар анча юқори нархда қайта сотилади” – сўзини давом эттирди Инфантино. – “Аслида, айримлар чипталаримиз нархини баланд деяётган бўлса-да, улар қайта сотиш бозорида бундан-да қимматроқ, бизнинг нархимиздан икки баравар юқори баҳода сотилмоқда”.

Инфантинонинг билдиришича, FIFA 2026-йилги Жаҳон чемпионати учун 500 миллиондан ортиқ чипта сўрови олган, бироқ 2018 ва 2022-йилги чемпионатлар учун жами 50 миллиондан кам сўров келиб тушган.

FIFA раҳбари гуруҳ босқичи чипталарининг 25 фоизи 300 доллардан арзонроқ нархда эканлигини қўшимча қилди.

“АҚШда 300 доллардан камига нафақат юқори даражадаги профессионал ўйинни, балки ҳатто коллеж ўйинини ҳам томоша қила олмайсиз”, — деди Инфантино. “Бу эса Жаҳон чемпионати”.

Гуруҳ босқичининг аксарият ўйинлари учун жойлар, гарчи жуда қиммат нархларда бўлса-да, ҳали ҳам мавжуд.

Чипталар ҳозирча FIFAнинг расмий веб-сайтида, “ласт-минуте sales” бўлимида сотилмоқда.