FIFA rahbari Infantino jahon chempionati chiptalari narxini himoya qildi

FIFA prezidenti Janni Infantino Jahon chempionati chiptalari narxini himoya qilib, AQShdagi chiptalarni nominal qiymatidan minglab dollar qimmatroqqa qayta sotishga ruxsat beruvchi qonunlardan foydalanishga majbur ekanligini ta’kidladi.

FIFA Jahon chempionati chiptalari narxi yuzasidan keskin tanqidlarga uchradi. Jumladan, “Football Supporters Europe” (FSE) nomli futbol ishqibozlari tashkiloti narx siyosatini “tovlamachilik” va “katta xiyonat” deb atadi.

O‘tgan hafta FIFAning Jahon chempionati chiptalarini qayta sotishga mo‘ljallangan “FIFA Marketplace” veb-saytida 19-iyul kuni Nyu-Yorkda bo‘lib o‘tadigan final o‘yiniga narxi 2 million dollardan oshadigan to‘rtta chipta sotuvga qo‘yilgani e’lon qilindi.

“Agar ayrimlar final chiptalarini qayta sotish bozoriga 2 million dollardan qo‘ygan bo‘lsa,  birinchidan, bu chiptalarning asl narxi 2 million dollar degani emas”, — dedi Infantino.

“Ikkinchidan, bu chiptalarni kimdir sotib olishini ham anglatmaydi. Bordi-yu kimdir finalga 2 million dollarga chipta sotib olsa, u ajoyib taassurotlar olishiga ishonch hosil qilish uchun shaxsan o‘zim unga hot-dog va kola olib kelaman”.

Bu yozgi chiptalar narxlari 2022-yilda Qatarda bo‘lib o‘tgan Jahon chempionati narxlari bilan solishtirildi.

2022-yilgi finalning eng qimmat chiptasi nominal qiymatda taxminan 1600 dollar turgan bo‘lsa, 2026-yilgi finalning eng qimmat chiptasi dastlabki narxda qariyb 11 000 dollarni tashkil etadi.

Infantino chiptalarning nominal qiymati keskin oshirilganini asosli deb qat’iy ta’kidladi.

U AQSH dunyodagi ko‘ngilochar soha eng rivojlangan bozorga egaligi, shu sababli, bozor narxlarini qo‘llash lozimligini ta’kidladi.

“AQShda chiptalarni qayta sotishga ham ruxsat berilgan. Demak, agar chiptalarni juda arzon sotsangiz, ular ancha yuqori narxda qayta sotiladi” – so‘zini davom ettirdi Infantino. – “Aslida, ayrimlar chiptalarimiz narxini baland deyayotgan bo‘lsa-da, ular qayta sotish bozorida bundan-da qimmatroq, bizning narximizdan ikki baravar yuqori bahoda sotilmoqda”.

Infantinoning bildirishicha, FIFA 2026-yilgi Jahon chempionati uchun 500 milliondan ortiq chipta so‘rovi olgan, biroq 2018 va 2022-yilgi chempionatlar uchun jami 50 milliondan kam so‘rov kelib tushgan.

FIFA rahbari guruh bosqichi chiptalarining 25 foizi 300 dollardan arzonroq narxda ekanligini qo‘shimcha qildi.

“AQShda 300 dollardan kamiga nafaqat yuqori darajadagi professional o‘yinni, balki hatto kollej o‘yinini ham tomosha qila olmaysiz”, — dedi Infantino. “Bu esa Jahon chempionati”.

Guruh bosqichining aksariyat o‘yinlari uchun joylar, garchi juda qimmat narxlarda bo‘lsa-da, hali ham mavjud.

Chiptalar hozircha FIFAning rasmiy veb-saytida, “last-minute sales” bo‘limida sotilmoqda.