Тошкент вилоятида неча нафар ўқувчи сувдан заҳарлангани очиқланди

Унда ёзилишича, жорий йилнинг 15 сентябридан 19 сентябрига қадар Олмалиқ шаҳридаги ихтисослашган мактаб ўқувчиларидан 12 нафари мактаб ҳудудида филтрланмаган сувни ичиши оқибатида ўткир ичак касаллигига чалиниб, юқумли касалликлар бўлимига мурожаат қилган.

"Ҳозирда мактаб ўқувчиларининг соғлиғи ижобий бўлиб, уларнинг 7 нафарига уйида даволанишга жавоб берилган", дейилади Болалар омбудсмани муносабатида.

Аммо хабарда қолган шифохонага мурожаат қилган беш нафар ўқувчининг уйида даволаниши учун қачон рухсат берилиши ёки ҳамон нега шифохонада қолаётгани айтилмаган. 

Ҳолат юзасидан Ўзбекистон Республикаси Соғлиқни Сақлаш вазирлиги Санитария-эпидемиологик осойишталик ва жамоат саломатлиги хизматининг Тошкент вилояти бошқармаси томонидан текшириш ишлари олиб борилиб, сувдан, озиқ-овқат маҳсулотлари ва бошқа воситалардан кимёвий таҳлил учун намуналар олинган. 

Шунингдек, муносабатда мазкур ҳолат вилоят мактабгача ва мактаб таълими бошқармасининг ишчи гуруҳи томонидан ўрганиш ишлари олиб борилаётгани қайд этилган. 

Бундан ташқари, ҳозирда ҳолат юзасидан Олмалиқ туман прокуратураси томонидан терговга қадар текширув олиб борилаётгани таъкидланган.