Тошкентда Греция элчихонаси очилди: виза, таълим ва туризм соҳасида қандай ўзгаришлар кутилмоқда?

Бу ҳақда Ўзбекистон ташқи ишлар вазири Бахтиёр Саидов Грециянинг Ўзбекистондаги Фавқулодда ва Мухтор Элчиси Параскеви Тзевелеки хонимнинг ишонч ёрлиқлари нусхаларини қабул қилгани муносабати билан ўзининг Telegram каналида маълум қилди.

Шу муносабат билан «Paradigma Media» (Paradigma.uz) нашри элчи Параскеви Тзевелеки хонимни суҳбатга таклиф қилди. Интервью давомида Ўзбекистон ва Греция ўртасидаги ҳамкорликнинг устувор йўналишлари, жумладан таълим, маданият, туризм ва Шенген визалари масалалари муҳокама қилинди.

Элчи хоним Ўзбекистонда олиб борилаётган очиқ ва кўп векторли ташқи сиёсатни, шунингдек, давлат раҳбариятининг халқаро ҳамкорликни кенгайтиришга қаратилган саъй-ҳаракатларини юқори баҳолади. Унинг таъкидлашича, президент Шавкат Мирзиёев бошчилигида амалга оширилаётган ислоҳотлар Ўзбекистоннинг халқаро майдондаги нуфузини оширмоқда.

Туризм ва саёҳат имкониятлари

Элчига кўра, туризм ҳар икки мамлакат учун ҳам муҳим йўналиш ҳисобланади. Хусусан, ушбу соҳа Греция ялпи ички маҳсулотининг қарийб 15 фоизини ташкил этади. Ўзбекистон ҳам туризм соҳасида катта мақсадларни олдига қўйган давлат сифатида баҳоланди.

“Греция Ўзбекистоннинг туризм соҳасидаги ривожланишини қўллаб-қувватлайди ва бу йўналишда ҳамкорликни кенгайтиришга тайёр”, — деди элчи.

Шенген визалари: нима ўзгариши мумкин?

Суҳбат давомида Paradigma Media асосчиси ва бош муҳаррири Хуршид Алимарданов томонидан Шенген визалари бўйича қарорлар қандай тартибда қабул қилиниши ҳақида савол берилди.

Бунга жавобан, элчи хоним Шенген визаси тизими ягона ва қатъий тартибга солинганини таъкидлаб, ҳозирда виза аризалари белгиланган аутсорсинг компаниялари орқали қабул қилиниб, кўриб чиқилаётганини маълум қилди.

Шу билан бирга, Грециянинг Ўзбекистондаги консуллик бўлими тўлиқ фаолият бошлаганидан сўнг амалдаги тизим қайта кўриб чиқилиши мумкинлиги айтилди.

“Дунёнинг кўплаб Греция элчихоналари амалиётига мувофиқ, айрим истиснолар жорий этилади ва баъзи ариза топширувчилар визани тўғридан-тўғри элчихонада топшириш имкониятига эга бўлади”, — деди элчи.

Бу эса келгусида Шенген визасини расмийлаштириш жараёнида Ўзбекистон фуқаролари учун муайян енгилликлар яратилиши мумкинлигини англатади.

Қуйида тўлиқ интервьюни YouTube саҳифамизда кўринг!

Таълим ва академик ҳамкорлик

Интервьюда таълим соҳасидаги ҳамкорликка ҳам алоҳида эътибор қаратилди. Элчи хонимнинг сўзларига кўра, 1997 йилда имзоланган таълим, фан ва маданият соҳасидаги келишув доирасида уч йиллик икки томонлама дастурни имзолаш режалаштирилмоқда.

Шунингдек, Грецияда таҳсил олишни истаган ўзбекистонлик талабалар учун стипендиялар ажратилаётгани, келгусида бу имкониятлар кенгайтирилиши маълум қилинди. Хусусан, бир нафар ўзбекистонлик талаба қизга тўлиқ грант асосида Грецияда таҳсил олиш имконияти яратилгани қайд этилди.

Суҳбатда университетлар ўртасида ҳамкорликни кучайтириш, талабалар ва ўқитувчилар алмашинуви, шунингдек, Ўзбекистонда онлайн грек тили курсларини жорий этиш режалари ҳам муҳокама қилинди.

Инсонлар ўртасидаги алоқалар

Элчи хоним таъкидлашича, мамлакатлар ўртасидаги сиёсий муносабатлар ижобий бўлса-да, жамиятлар бир-бирини ҳали етарлича яхши танимайди. Шу боис, Тошкентда Греция элчихонасининг очилиши келгусида Афина шаҳрида Ўзбекистон элчихонасининг тўлиқ фаолият бошлашига замин яратиши мумкин.

Бу эса инсонлар ўртасидаги алоқаларни, таълим ва маданий алмашинувларни сезиларли даражада кучайтиришга хизмат қилиши таъкидланди.

Суҳбат ва интервью учун «Paradigma Media» жамоаси Грециянинг Ўзбекистондаги Фавқулодда ва Мухтор Элчиси Параскеви Тзевелеки хонимга миннатдорчилик билдиради.

_{📍 Манзил: Шаршара тор кўчаси, 131-уй, Яккасарой тумани, Тошкент шаҳри, 100066 Ўзбекистон,} 

_{🌐 Расмий сайт: mfa.gr/missionsabroad/en/uzbekistan.html}

_{✉️ Электрон почта: gremb.tsk@mfa.gr}