Тошкентнинг 10 нафар имом ноиби ишдан олинди

“Мажлис аввалида ҳар бир имом-хатиб дин ғами, халқ дарди ва юрт тақдири йўлида астойдил хизмат қилиши лозимлиги, дин пешвоси сифатида, аҳоли, айниқса, ёшларни тўғри йўлга бошлаши алоҳида таъкидланди. Шунингдек, сўнгги йиллардаги неъматлар қадрига етиш ва берилган имкониятлардан унумли фойдаланишга катта урғу қаратилди”, дейилади хабарда.

Йиғилиш давомида муфтий томонидан айрим имом-домлалар зиммасидаги бирламчи вазифасига жиддий ёндашмаётгани, мўмин-мусулмонлар эҳтиёжини таъминлашда етарли саъй-ҳаракат қилмаётгани ва ижро интизомидаги нуқсонлар танқид остига олинган. Шунингдек, белгиланган тартиб-қоидалар, меҳнат шартномалари талаблари ва лавозим йўриқномаларига риоя этмаётган имом-домлаларга чора кўрилгани билдирилган.

“2024 йилнинг ўтган саккиз ойида мана шундай хато-камчиликларни содир этган, дин пешвоси сифатида иш фаолиятига эътибор қаратмаган ва меҳнат мажбуриятларини етарли даражада бажармаган Тошкент шаҳридаги масжидларда фаолият юритган 8 нафар имом-хатиб, 10 нафар имом ноиби вазифасидан озод этилган ҳамда 2 нафар имом-хатиб ва 2 нафар имом ноибига эса ҳайфсан интизомий чораси қўлланган”, дейилади хабарда.

Аммо хабарда юқорида таъкидланганидек, меҳнат мажбуриятларини етарли даражада бажармаган имомлар қайси масжидда фаолият юритиши ва улар кимлар экани ҳақида маълумот очиқланмаган.

Тадбир якунида эса муфтий ҳар бир имом-хатиб дин ва меҳроб омонатини чуқур ҳис этиши, фаолиятини яхшилаб бориши, замон билан ҳамнафасликда доимий билим-малакаларини ошириши ва пешволик мақомига муносиб бўлишига алоҳида тўхталган. Шунингдек, у барча имом-хатибларни ушбу мартабада шариат ходими сифатида ихлос-у муҳаббат, тақво ва садоқат билан хизмат қилишларига даъват этгани билдирилган.