Сурхондарёда экскаватор ичига яширилган қарийб 600 кг наркотик модда фош этилди

Дастлабки маълумотларга кўра, наркотик моддалар экскаваторнинг кўтаргич қисмига яширилган бўлган.

Давлат хавфсизлик хизмати тезкор бўлинмалари, Чегара қўшинлари ҳамда Божхона қўмитаси ходимлари ҳамкорлигида ўтказилган тезкор-қидирув тадбирлари давомида йирик миқдордаги наркотик воситаларнинг ноқонуний айланмасига чек қўйилди.

Маълум қилинишича, Афғонистон фуқароси бошқарувидаги “Mercedes” русумли юк автомашинаси Сурхондарё вилоятидаги “Термиз-авто” чегара божхона пости орқали Ўзбекистон ҳудудига кириб келган. Автомашина тиркамасида олиб келинаётган “Doosan” русумли экскаватор божхона текширувидан ўтказилган.

Инспекцион-кўрик мажмуаси орқали сканер қилинганда, экскаваторнинг кўтаргич қисмида конструкцияда назарда тутилмаган шубҳали жисмлар борлиги аниқланган. Шундан сўнг махсус эндоскоп ускунаси ёрдамида кўздан кечириш ишлари олиб борилган.

Текширув натижасида экскаваторнинг “стрела” қисми ичига яширилган ҳолда 593 килограмм “гашиш” ва 3 килограмм “опий” гиёҳвандлик воситалари борлиги маълум бўлди.

Ҳозирда мазкур ҳолат юзасидан Ўзбекистон Республикаси Жиноят кодексининг 246 ва 273-моддалари асосида жиноят иши қўзғатилган. Ҳуқуқни муҳофаза қилувчи органлар наркотик моддаларнинг эгалари ва ушбу жиноятга алоқадор шахсларни аниқлаш бўйича тезкор чора-тадбирларни давом эттирмоқда.