Зеленский: Путин мақсадига эришолмади, биз Украинани сақлаб қолдик

Володимир Зеленский уруш бошланганининг тўрт йиллигига бағишланган мурожаатида Украина Россия босқинидан буён ўз мустақиллигини ҳимоя қилиб келаётганини, тинчликка эришиш йўлида халқи берган қурбонликларга хиёнат қилмаслигини таъкидлади.

“Путин ўз мақсадларига эриша олмади. У Украина халқини синдиролмади. У бу урушда ғалаба қозонмади”, — деди Зеленский сешанба куни.

“Биз Украинани сақлаб қолдик. Бундан кейин ҳам тинчликка эришиш ҳамда адолатни таъминлаш учун қўлимиздан келган барча ишни қиламиз”.

Киевда Россиянинг 2022 йил 24 февралдаги кенг кўламли босқинининг тўрт йиллигига бағишланган маросим бўлиб ўтди.

Унга Украинанинг иттифоқчиларидан юқори мартабали меҳмонлар, жумладан, Еврокомиссия раиси Урсула фон дер Ляен қатнашди.

Иккинчи жаҳон урушидан кейин Европадаги энг қонли можаро бўлган бу тўқнашувда ҳар икки томондан юз минглаб аскарлар ҳалок бўлди ёки яраланди.

Асосий вайронкорлик Украина ҳудудига тўғри келади. Россия кучлари ўн минглаб тинч аҳолини ўлдирди. Ракета ҳамда дрон зарбалари билан Украина шаҳарларини барбод қилди.

Қўшма Штатлар воситачилигидаги Россия билан тинчлик музокаралари ҳудуд масаласидаги келишмовчилик туфайли тўхтаб қолди.

Жанг майдонида тошбақадек секин ҳаракат қилаётган Москва шарқий Донетскнинг қолган 20 фоизини ҳам сўрамоқда.

Киев эса минглаб одамлари жонини фидо қилиб ҳимоя қилган ерларининг бир қаричидан ҳам воз кечмаслигини қатъий таъкидлади.

Зеленский ўз мурожаатида ҳукумати мустаҳкам, муносиб ва барқарор тинчлик исташини билдирди.

У Украина номидан тинчлик музокарачиларига айтган гапларини эслатди: “Шунча йиллик меҳнатингизни йўққа чиқарманг. Украина бошидан ўтказган барча курашларни, жасоратни, қадр-қимматни – ҳаммасини қадрсизлантирманг. Биз буларни қўлдан чиқармаймиз, унутмаймиз ва унга хиёнат қилмаймиз”.

Зеленский нутқи сўнгида улар тарихдаги энг оғир қишдан ўтаётгани, шунингдек, келажакдаги Украина учун қадам-бақадам, вазифама-вазифа, ютуқма-ютуқ ҳаракат қилаётгани ва бунинг барчаси бутун Украина халқининг хизмати эканини айтиб ўтди.