Анора Содиқовага нисбатан ҳақорат иши: блогер Мирсаид Ҳайдаров 25 млн сўм маънавий зарар тўлади

Ижтимоий тармоқларда блогердан Анора Содиқова фойдасига ундирилиши лозим бўлган маблағ тўланмаётгани ҳақида хабарлар тарқалган эди. Мажбурий ижро бюроси ахборот хизмати маълум қилишича, 26 декабрь куни ижро иши доирасида белгиланган сумма тўлиқ ундириб берилган.

Қайд этилишича, Тошкент шаҳар судининг ижро варақасига асосан, Мирсаид Ҳайдаровдан ундирувчи фойдасига 25 млн сўм маънавий зарар ҳамда 5 млн 643 минг 500 сўм суд харажатлари ундириш белгиланган. Ушбу ижро ҳужжати жорий йил 19 декабрь куни Мажбурий ижро бюросининг Бектемир туман бўлими иш юритувига келиб тушган ва шу куниёқ ижро иши қўзғатилган.

Ижро жараёнида қарздорнинг мол-мулкларига тақиқ қўйилган ҳамда қарздорликни ихтиёрий равишда бартараф этиш учун 10 кунлик муддат берилган. Шу билан бирга, белгиланган муддатда тўлов амалга оширилмаса, мажбурий ижро чоралари қўлланилиши ҳақида огоҳлантирилган.

МИБ маълумотига кўра, 26 декабрь куни Мирсаид Ҳайдаров томонидан жами 30 млн 643 минг 500 сўм қарздорлик тўлиқ қопланган. Ушбу маблағ ундирувчи Анора Содиқованинг шахсий пластик картасига унинг розилиги асосида ўтказиб берилган.

Ижро ҳужжати амалда бажарилгани сабабли иш юритув тугатилган.

Маълумки, жорий йил 28 май куни Фуқаролик ишлари бўйича Шайхонтоҳур туманлараро суди Анора Содиқованинг Мирсаид Ҳайдаровга нисбатан шаън, қадр-қиммат ва ишчанлик обрўсини ҳимоя қилиш ҳақидаги даъво талабларини рад этган эди. Бироқ 21 июль куни Фуқаролик ишлари бўйича Тошкент шаҳар суди апелляция инстанцияси мазкур қарорни бекор қилди.

Апелляция суди қарори билан Мирсаид Ҳайдаровга:

• 25 млн сўм маънавий зарар тўлаш,
• 5 млн 643,5 минг сўм суд харажатларини қоплаш,
• Анора Содиқовадан очиқ тарзда узр сўраш,
• ҳақоратли постларни ўчириш мажбурияти юклатилган эди.