2,6 milliard soʻmlik davlat xaridi qonunchilikka zid tarzda oʻtkazilishining oldi olindi

“Davlat xaridlari toʻgʻrisida”gi qonunga koʻra, davlat xaridlarining asosiy prinsiplarida ochiqlik va shaffoflik, raqobat va xolislik, korrupsiyaga yoʻl qoʻymaslik kabilar ustuvor boʻlishi kerak.

Har qanday ehtimoliy, taxmin qilinayotgan yoki mavjud manfaatlar toʻqnashuvi haqidagi axborot oshkor qilinishi zarur. 

Korrupsiyaga qarshi kurashish agentligi tomonidan davlat xaridlarida qonuniylikni taʼminlashga qaratilgan oʻrganishlar davom ettirilmoqda.

Agentlik davlat buyurtmachisi tomonidan 2,6 milliard soʻmlik davlat xaridida qonunbuzilishiga yoʻl qoʻyilganini aniqladi.

«Temiryoʻlinfratuzilma» aksiyadorlik jamiyati buyurtmasi asosida 2,6 milliard soʻmlik “taʼmirlash xizmatlari koʻrsatish” yuzasidan oʻtkazilgan davlat xaridida “Davlat xaridlari toʻgʻrisida”gi qonunning qator talablariga zid ravishda oʻzaro affillangan shaxslar ishtirok etgan.

Qayd etilgan holat yuzasidan agentlikning taqdimnomasi asosida xarid komissiyasining gʻolibni aniqlash haqidagi bayonnomalari bekor qilinib, noqonuniy davlat xaridining oldi olindi.

Oʻrganish va tahlillar jarayonida toʻplangan hujjatlar  qonuniy chora koʻrish uchun huquqni muhofaza qiluvchi organlarga yuborildi.