Toshkentda xalqaro moliya markazi quriladi: Saida Mirziyoyeva Nyu-Yorkda «BlackRock» rahbariyati bilan uchrashdi

Prezident administratsiyasi rahbari Saida Mirziyoyeva 24-sentyabr kuni Nyu-Yorkda BlackRock rahbariyati bilan uchrashdi. Muzokaralarda kompaniya prezidenti Robert Kapito, vitse-rais Tomas Donilon, "Global Infrastructure Partners" raisi va bosh ijrochi direktori Adebayo Ogunlesi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi bo‘yicha rahbari Charlz Xatami ishtirok etdi.

Muloqot davomida 2027-yilda Toshkent xalqaro moliya markazi faoliyatini yo‘lga qo‘yish masalasi muhokama qilindi. BlackRock ushbu Markaz konsepsiyasi va tuzilmasini ishlab chiqishda ko‘maklashmoqda. AQSh ishbilarmon doiralari vakillari ishtirokidagi qo‘shma davra suhbatida esa O‘zbekiston va mintaqaning yaqin o‘n yilliklarga mo‘ljallangan rivojlanish istiqbollari yuzasidan fikr almashildi.

"O‘zbekiston yirik, samarali, sifatli sarmoyalar uchun yangi imkoniyatlar maydoniga aylanmoqda", — dedi Saida Mirziyoyeva.

Markaz Angliya huquqi asosida faoliyat yuritadigan alohida huquqiy maqomga ega hudud sifatida tashkil etiladi. Uning mustaqil tijorat sudi, o‘ziga xos tartibga solish tizimi hamda xalqaro standartlarga mos huquqiy muhiti bo‘ladi. Banklar, fintex, sug‘urta, islom moliyasi va kripto kompaniyalari uchun Angliya huquqi asosidagi qoidalar amal qiladi, nizolar esa xalqaro tijorat sudida ko‘rib chiqiladi.

Ma'lumot o'rnida, BlackRock — aktivlar va jamg‘armalarni boshqarish hamda moliyaviy xizmatlar ko‘rsatishga ixtisoslashgan dunyodagi eng yirik investitsiya kompaniyalaridan biri bo'lib,  2026-yilda kompaniya boshqaruvidagi aktivlar hajmi 14 trillion dollarga yetgan.