Тошкентда халқаро молия маркази қурилaди: Саида Мирзиёева Нью-Йоркда «BlackRock» раҳбарияти билан учрашди

Президент администрацияси раҳбари Саида Мирзиёева 24-сентябрь куни Нью-Йоркда BlackRock раҳбарияти билан учрашди. Музокараларда компания президенти Роберт Капито, вице-раис Томас Донилон, «Global Infrastructure Partners» раиси ва бош ижрочи директори Адебайо Огунлеси, Молиявий ва стратегик инвесторлар гуруҳи глобал раҳбари ҳамда компаниянинг Яқин Шарқ минтақаси бўйича раҳбари Чарлз Хатами иштирок этди.

Мулоқот давомида 2027 йилда Тошкент халқаро молия маркази фаолиятини йўлга қўйиш масаласи муҳокама қилинди. BlackRock ушбу Марказ концепцияси ва тузилмасини ишлаб чиқишда кўмаклашмоқда. АҚШ ишбилармон доиралари вакиллари иштирокидаги қўшма давра суҳбатида эса Ўзбекистон ва минтақанинг яқин ўн йилликларга мўлжалланган ривожланиш истиқболлари юзасидан фикр алмашилди.

«Ўзбекистон йирик, самарали, сифатли сармоялар учун янги имкониятлар майдонига айланмоқда», — деди Саида Мирзиёева.

Марказ Англия ҳуқуқи асосида фаолият юритадиган алоҳида ҳуқуқий мақомга эга ҳудуд сифатида ташкил этилади. Унинг мустақил тижорат суди, ўзига хос тартибга солиш тизими ҳамда халқаро стандартларга мос ҳуқуқий муҳити бўлади. Банклар, финтех, суғурта, ислом молияси ва крипто компаниялари учун Англия ҳуқуқи асосидаги қоидалар амал қилади, низолар эса халқаро тижорат судида кўриб чиқилади.

Маълумот ўрнида, BlackRock — активлар ва жамғармаларни бошқариш ҳамда молиявий хизматлар кўрсатишга ихтисослашган дунёдаги энг йирик инвестиция компанияларидан бири бўлиб, 2026 йилда компания бошқарувидаги активлар ҳажми 14 триллион долларга етган.