Eron o‘g‘illarimdan birini o‘ldirmoqchi bo‘ldi – Netanyahu

Isroil Bosh vaziri Benyamin Netanyahu Eron uning o‘g‘illaridan biriga suiqasd qilishga uringanini ma’lum qildi. Bu haqda Reuters yozdi.

Biroq go‘yoki rejalashtirilgan fitna qachon bo‘lgani, qaysi o‘g‘ilga qaratilgani yoki uning amalga oshirilishiga qanchalik oz qolgani haqida tafsilotlar keltirmadi.

Koalitsiyasi ijtimoiy so‘rovnomalarda ortda qolayotgan Netanyahu bu da’voni 27-oktyabr kuni o‘tkaziladigan umumxalq saylovlariga ikki oy qolganda ilgari surmoqda.

"O‘g‘illarimga kelsak... Bu yerda, nazarimda, aql bovar qilmaydigan bir gap bor. Eron o‘g‘illarimdan birini nishonga olgan. Eron o‘g‘illarimdan birini o‘ldirishga uringan," – dedi Netanyahu hukumat faoliyatini ijobiy yoritishi bilan tanilgan konservativ “14-kanal” telekanaliga.

“Eron o‘g‘illarimdan birini o‘ldirishga urindi, shuning uchun xavfsizlik choralari hashamat emas”, – dedi u, da’vo qilingan suiqasd fitnasi yoki uning amalga oshirilishiga qanchalik yaqin kelingani haqida qo‘shimcha ma’lumot bermagan holda.

U o‘g‘illaridan aynan qaysi birini nazarda tutayotgani ham noaniq. Netanyahuning katta o‘g‘li Yair AQSHning Florida shtati, Mayami shahrida istiqomat qiladi. Kichik oʻgʻil Avner Netanyahu Isroilda yashaydi.

Eronning Birlashgan Millatlar Tashkilotidagi Nyu-York missiyasi bu ayblov yuzasidan Reuters’ning izoh berish so‘roviga javob qaytarmagan.