Aliment toʻlovchilarga yengillik boʻlishi mumkin

Qayd etilishicha, oʻtgan yili aliment masalalari boʻyicha 70 mingga yaqin murojaat kelib tushgan. Majburiy ijro byurosi aliment undirish boʻyicha arizalarni ijroga qabul qilayotgan boʻlsa-da, aliment toʻlovchilarning rasmiy daromadi mavjud emasligi sabab murojaatlarning qariyb 30 foizi hal etilmay qolmoqda.

Shu bilan birga, ayrim hududlarda hokimliklar aliment toʻlovchilarning bandligini tahlil qilmayotgani tanqid qilindi. Xususan, qancha shaxsning kasbi bor, lekin ishsiz ekani yoki qanchasini kasbga oʻqitish kerakligi boʻyicha aniq hisob-kitoblar olib borilmayotgani taʼkidlandi.

Maʼlum qilinishicha, bandlik boʻlimlari va “mahalla yettiligi” bilan hamkorlikda bu masalaga tizimli yondashilsa, aliment boʻyicha murojaatlar sonini ikki barobargacha kamaytirish mumkin.

Shuningdek, fuqarolarni kasbga oʻqitish va tashkiliy mehnat migratsiyasi asosida chet elda yuqori daromadli ishlarga yuborish tizimi yoʻlga qoʻyilgani qayd etildi. Biroq aliment majburiyati bor shaxslar bu imkoniyatdan toʻliq foydalana olmayapti. Chunki ularning chet elga chiqishi uchun 5 yillik aliment toʻlovini oldindan toʻlash yoki aliment oluvchining yozma roziligini olish talab qilinadi.

Prezident mutasaddilarga ushbu masalani atroflicha oʻrganib, aliment toʻlovchilar uchun qulay va samarali yechimlar boʻyicha takliflar tayyorlash vazifasini yukladi.