Rossiyada migrantlar uchun majburiy imtihon bekor qilinishi mumkin

Rossiya Ichki ishlar vazirligi ilg‘or ijtimoiy-iqtisodiy rivojlanish hududlarida faoliyat yurituvchi ish beruvchilarga ishga kirgan ayrim xorijiy fuqarolarni majburiy imtihondan ozod qilishni taklif etdi.

RBC xabariga ko‘ra, tegishli qonun loyihasi chet ellik ishchilarni rus tilini bilish, Rossiya tarixini hamda mamlakat qonunchiligi asoslarini o‘zlashtirganini tasdiqlash talabidan ozod qilishni nazarda tutadi. Taklif ish beruvchisi ilg‘or rivojlanish hududi rezidenti bo‘lgan korxona yoki tashkilotlarda ishlash uchun ruxsat olgan xorijliklarga taalluqli.

Rossiyada bunday hududlar Uzoq Sharq, Arktika zonasi va boshqa ayrim hududlarda mavjud. Rossiya hukumati bu choradan investitsiyalarni jalb etish uchun qulay sharoit yaratish va hududlarning ijtimoiy-iqtisodiy rivojlanishini jadallashtirish maqsadida foydalanmoqchi.

Hozircha bu faqat qonun loyihasi. Amaldagi umumiy tartib bo‘yicha imtihon topshirish talabi bekor qilinmagan. Shu sababli o‘zgarish barcha mehnat migrantlariga, jumladan, Rossiyada ishlayotgan o‘zbekistonliklarga ham avtomatik ravishda tatbiq etilmaydi.