Sankt-Peterburgda migrantlarga taqiq ortidan taksi narxlari oshdi

 “Fontanka.ru” nashri maʼlumotlariga koʻra, jurnalistlar 6 va 7 noyabr kunlari Sankt-Peterburg boʻylab “Yandeks Taksi”ning “Komfort” tarifidagi safarlarni taqqoslashgan. 7 noyabr — taqiq kuchga kirgan kuni — narxlar bir kun oldingidan 3,2 foizdan 32,5 foizgacha qimmatlashgan.

Ayrim foydalanuvchilar ilovada shunday xabarni koʻrishgan:

“Haydovchilar yetishmayapti, taksini uzoqroq kutishga toʻgʻri keladi. Safarlaringizni ertaroq rejalashtiring. Jamoat transportida tezroq yetib borishingiz mumkin”.

“Yandeks Taksi” maʼmuriyati maʼlum qilishicha, yangi cheklov tufayli Peterburgdagi taksi haydovchilari soni 12 foizga kamaygan, yaʼni 4 mingdan ortiq kishi ishsiz qolgan. Ekspertlar buni “yengib boʻlmas kadr tanqisligi fonida yana bir zarba” sifatida baholamoqda.

Migrantlarning taksi va kurerlik sohalarida ishlashi Sankt-Peterburg gubernatori Aleksandr Beglovning avgust oyidagi qarori bilan taqiqlangan. Rasmiylar buni:

• “norasmiy bandlikka qarshi kurash”,
• “xizmatlar sohasida xavfsizlikni oshirish”,
• “talabalar uchun ish joylari yaratish”
  deb izohlashgan.