Эрон ва Уммон Ҳурмуз бўғозида вақтинчалик коридор очишни муҳокама қилмоқда

25 август куни Эрон ва Уммон ташқи ишлар вазирлари Теҳронда учрашди. Учрашувда Ҳурмуз бўғози орқали кемалар ҳаракатини босқичма-босқич тартибга солиш масаласи муҳокама қилинди.

Уммон ташқи ишлар вазири Бадр ал-Бусайдий ва унинг эронлик ҳамкасби Аббос Ароқчи “кейинги қадамлар учун асос яратувчи босқичма-босқич ёндашувни муҳокама қилдилар”, дейилади қўшма баёнотда.

Таклиф этилаётган ёндашув бўғоз орқали “вақтинчалик қўшма навигация йўлаги” очишни ва сув йўлини миналардан тозалаш лойиҳасини ўз ичига олади.

Кейинги музокараларда доимий навигация йўлаги, бўғознинг келажакдаги бошқаруви, ахборот алмашиш, ҳаракатни тартибга солиш ҳамда тегишли навигация ва хавфсизлик механизми йўлга қўйилиши режалаштирилган.

“Тез орада Ҳурмуз бўғози учун вақтинчалик йўлак очилишини эълон қилишимизга умидворман,” — деб ёзди Албусайдий X ижтимоий тармоғида.

У икки давлат доимий ечим топиш, шунингдек, бўғозни ким бошқариши бўйича келишувга эришиш устида ишлашини қўшимча қилди.

Эрон ташқи ишлар вазири ўринбосари Козим Ғарибободийнинг давлат телевидениесига маълум қилишича, Уммон кўрфазидан Форс кўрфазига кирувчи денгиз транспорти учун вақтинчалик йўлак тўлиқ Эрон сувлари орқали, чиқиш йўлаги эса Эрон ва Уммон сувлари орқали ўтади.

Ғарибободийнинг қўшимча қилишича, Эрон ва Уммон 30 кундан 60 кунгача давом этадиган кейинги музокараларни ўтказади.

“Уммонни бомбалаймиз”

Учрашув АҚШ президенти Дональд Трамп Вашингтон ва Теҳрон ўртасидаги Ҳурмуз бўғози юзасидан музокараларга Уммон тўсқинлик қилгудек бўлса, унга зарба бериш билан таҳдид қилганидан бир ҳафта ўтиб ўтказилди.

“Агар Уммон йўлимизга тўғаноқ бўлса, биз уларни бомбардимон қиламиз”, – деди Трамп АҚШ ва Эрон ўртасидаги июнь ойи англашув меморандумининг муддати тугаши билан.

Шундай қилиб, Трампнинг Эрон ва Уммон ўртасида эришилган келишувни қабул қилиши ноаниқ.