Tuproqqalʼada quyosh fotoelektr stansiyasi qurilmoqda

Xorazmda viloyatining eng chekka hududi boʻlgan Tuproqqalʼa tumanida Fransiyaning “Voltaliya” kompaniyasi bilan hamkorlikda barpo etilayotgan quyosh fotoelektr stansiyasi loyihasi amalga oshirilmoqda. Qariyb 180 gektar maydonda 180 mingdan ziyod quyosh panellari oʻrnatiladigan bu stansiya ayni damda Oʻzbekistondagi eng yirik “yashil energiya” loyihalaridan biri sanaladi.

–  2030 yilga kelib mamlakatimiz aholisining 40 milliondan oshishi va yangi iqtisodiyot uchun energiya talabining 40 foizi “yashil” manbalardan qoplanishi maqsad qilingan, – deydi Xorazm viloyat hududiy qurilish va uy-joy kommunal xoʻjaligi sohasida nazorat qilish inspeksiyasi matbuot xizmati rahbari Shahnoza Qalandarov. – Bu yoʻnalishda “Quyoshli xonadon” dasturi aholining energiyaga boʻlgan qiziqishini oshirdi, soliq va moliyaviy imtiyozlar esa qulaylik yaratmoqda. Ushbu stansiya ishga tushgach, 60 ming xonadon quyosh energiyasi bilan taʼminlanadi, mahalliy aholi uchun esa 250 ta yangi ish oʻrni yaratiladi – bu esa nafaqat energetika sohasida, balki ijtimoiy taraqqiyotda ham muhim qadamdir.

Qurilish ishlarini "China Machinery Engineering Corporation" kompaniyasi olib bormoqda. Barpo etish jarayonlariga 500 nafarga yaqin mutaxassis jalb etilgan, ularning 100 dan ortigʻi Xitoydan kelgan yuqori malakali mutaxassislardir.

– Bizning kompaniyamiz 1978 yilda tashkil topgan boʻlib, energetika, telekommunikatsiya, transport va suv resurslari infratuzilmalarini yaratish  bilan shugʻullanadi. Oʻzbekiston va Xitoy oʻrtasidagi hamkorlik aloqalari tobora mustahkamlanib borayotgani bizning kompaniyamiz ham mamlakatingizda katta loyihalarda ishtirok etishiga imkon yaratdi. Bu fotoyelektr stansiyasi bizning 3-loyihamiz hisoblanadi. Uni ham oʻz vaqtida sifatli bajarishga harakat qilamiz, – deydi "China Machinery Engineering Corporation" kompaniyasi bosh mutaxassisi Andy Xie. 

"Sarimay 100MW" loyihasi amalga oshsa, Xorazm viloyatining elektr energiyasi ishlab chiqarish quvvati 30 foizga oshadi va 424 megavattga yetkaziladi. Tuproqqalʼa tumani esa yillik 135 million kilovatt-soatlik elektr talabini toʻliq qondirishi mumkin boʻladi. Bundan tashqari, tabiiy gaz tejalib, atrof-muhitga chiqadigan zararli moddalar 106 ming tonnaga kamayadi – bu esa ekologiyani saqlashda muhim ahamiyatga ega.