Rasmiy munosabat: “Darband”dagi tarozi hokimning qarindoshiga tegishliligi rad etildi

Mazkur xabarga viloyat hokimligi matbuot xizmati munosabat bildirib, “Darband” postida oʻrnatilgan “Tenso M VA–20P” rusumli yuk tarozisini Boysun tumani yoʻllardan foydalanish korxonasi davlat muassasasi Prezidentimizning 2023 yil 10 oktabrdagi “Yoʻl xoʻjaligi sohasini yanada takomillashtirish chora-tadbirlari toʻgʻrisida”gi qarori hamda Vazirlar Mahkamasining 2011 yil 26 dekabrdagi qaroriga muvofiq oʻrnatganini maʼlum qildi. 

Rasmiy munosabatda aytilishicha, mazkur tarozi xususiy shaxsga emas, balki davlat korxonasiga tegishli boʻlib, u viloyat hokimining qarindoshiga aloqador ekani haqidagi maʼlumotlar mutlaqo asossiz va haqiqatga toʻgʻri kelmaydi. “Darband” postidagi yuk ogʻirligini oʻlchash tizimi – yoʻl infratuzilmasini saqlash, avtotransport vositalari harakati xavfsizligini taʼminlash hamda ortiqcha yuk tashish holatlarining oldini olish maqsadida yuqoridagi meʼyoriy hujjatlar asosida oʻrnatilgan.

Hozir viloyat ichki ishlar boshqarmasi yoʻl harakati xavfsizligi boshqarmasi hamda viloyat avtomobil yoʻllari bosh boshqarmasi “Darband” postidagi nazorat jarayonlarini 24/7 rejimida kuzatuv va tahlil ostiga olgan.

Olib borilgan tekshiruvlar shuni koʻrsatmoqdaki, ayrim ogʻir yuk mashinalari ogʻirlik nazoratidan qochish maqsadida post yaqinida sunʼiy tirbandlik hosil qilgan. Yaʼni, ikki yoʻnalish boʻyicha 30-40 tadan ortiq yuk avtomobili yoʻl chetida toʻxtab turgan holda harakatni toʻsib qoʻygan. Ularga belgilangan tartibda nazoratdan oʻtish va harakatni davom ettirish taklif etilgan boʻlsa-da, ayrim haydovchilar buni rad etib, tirbandlikni sunʼiy ravishda kuchaytirishda davom etmoqda. Shunga qaramay, meʼyordagi yuk bilan harakatlanayotgan transport vositalari belgilangan tartibda vazn nazoratidan toʻsiqsiz oʻtmoqda. Ularning harakatida hech qanday muammo kuzatilmayapti.

Munosabat yakunida Surxondaryo viloyati hokimligi ijtimoiy tarmoqlarda tarqatilayotgan asossiz maʼlumotlarga ishonmaslikni va faqat rasmiy manbalarga tayanishni tavsiya etgan.