Toshkentdan Sirdaryoga koʻchayotgan biznesmenlarga yangi imtiyozlar beriladi

Prezident Shavkat Mirziyoyev ishtirokida oʻtgan Xalq deputatlari Sirdaryo viloyati kengashining navbatdan tashqari sessiyasida mazkur yoʻnalish boʻyicha muhim yangiliklar maʼlum qilindi.

Qarorga koʻra, korxonasini Sirdaryo viloyatiga koʻchirmoqchi boʻlgan tadbirkorlarga bir qator imtiyozlar taqdim etiladi. Xususan:

• Sirdaryo erkin iqtisodiy zonasidan soddalashtirilgan tartibda va chegirma asosida yer ajratiladi;
• 10 milliard soʻmgacha imtiyozli kredit beriladi;
• Xomashyolarni temir yoʻl transporti orqali tashishda arzonlashtirilgan tariflar qoʻllanadi.

Viloyatda faoliyat yuritayotgan 1 140 ta sanoat korxonasidan 129 tasi past quvvatda ishlayotgani qayd etildi. Sabab sifatida ehtiyot qism va butlovchilarni chetdan olib kelish tufayli tannarx oshib ketayotgani aytildi. Ushbu mahsulotlarni hududning oʻzda ishlab chiqarish orqali tannarxni 10 foizgacha kamaytirish mumkinligi taʼkidlandi.

Shuningdek, “Farovon” kichik sanoat zonasiga tutash 200 gektar maydonda butlovchi qismlar ishlab chiqarish klasteri tashkil etish tashabbusi qoʻllab-quvvatlandi. Hududda infratuzilma mavjud boʻlgani sababli qoʻshimcha xarajatlar talab etilmaydi. Viloyat hokimligiga bu yerda 800 million dollarlik mahalliylashtirish loyihalarini yoʻlga qoʻyish topshirildi.