Yagona namunadagi elektron guvohnoma joriy etildi

Bu haqda Vazirlar Mahkamasining “Avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha nodavlat taʼlim xizmatlarini koʻrsatish faoliyatini litsenziyalash tartibini yanada takomillashtirish chora-tadbirlari toʻgʻrisida” 2018 yil 31 maydagi 408-son qarorga oʻzgartirish va qoʻshimchalar kiritish haqidagi Hukumat qarori (№642, 15.10.2025 y.) qabul qilindi.

Qarorga koʻra, avtomototransport va shahar elektr transporti haydovchilarini tayyorlash yoki qayta tayyorlash boʻyicha taʼlimni tugatib, imtihonlarni muvaffaqiyatli topshirgan nomzodlarga oʻquv tashkiloti tomonidan imtihon komissiyasi bayonnomasi asosida yagona namunadagi elektron guvohnoma rasmiylashtiriladi.

Elektron guvohnomalar DYHXX Yagona axborot tizimidagi “e-avtota’lim.uz” moduli orqali avtomatik shakllantiriladi. Unda nomzodning oʻquv tashkilotida taʼlimni tugatganligi va imtihondan oʻtgani haqidagi maʼlumotlar aks etadi.

Bundan tashqari, mazkur elektron guvohnoma milliy haydovchilik guvohnomasini olish uchun zarur boʻlgan nazariy va amaliy imtihonlar jarayoni bilan bogʻliq davlat xizmatlarini koʻrsatuvchi subʼektlarga “e-avtota’lim.uz” orqali real vaqt rejimida avtomatik ravishda taqdim etiladi.

Shuningdek, qarorda elektron guvohnoma uchun hech qanday yigʻim undirilmasligi ham belgilab qoʻyilgan.