Ozarbayjonda maktab formasi qoidalariga qarshi noroziliklarda 37 kishi hibsga olindi

Ozarbayjon poytaxti Bokuda maktab formasiga oid yangi qoidalarga qarshi noroziliklar fonida 37 kishi hibsga olindi. Bu haqda CentralAsia.media Minval nashriga tayanib xabar berdi. Ma’lumotga ko‘ra, namoyishchilar maktab xodimlari bilan to‘qnashgan, ta’lim muassasalari faoliyati va transport harakatiga xalaqit berishga uringan.

Minval xabariga ko‘ra, Bokuning Garadog‘ tumanida maktab direktorlaridan birining avtomobili yoqib yuborilgan. Yasamal tumanida esa maktabni yoqishga urinish bo‘lgan. Har ikki holatda ham jabrlanganlar yo‘q.

Noroziliklar davomida Instagram va TikTok faoliyatida ham uzilishlar kuzatilgani aytilmoqda.

Hodisalarga aloqador holatlar yuzasidan Ozarbayjon Jinoyat kodeksining 233-moddasi – jamoat tartibini buzishga olib keladigan harakatlarni tashkil etish yoki ularda faol qatnashish bo‘yicha jinoiy ish qo‘zg‘atilgan. Mazkur modda bo‘yicha uch yilgacha ozodlikdan mahrum qilish jazosi belgilanishi mumkin.

Maktab formasiga qanday talablar joriy etildi?

Ozarbayjon hukumati 21-sentabr kuni maktab formasiga oid yangi qoidalarni tasdiqlagan. Unga ko‘ra, o‘quvchilarga ta’limning dunyoviy xususiyatiga zid yoki yagona maktab formasi talablariga mos kelmaydigan kiyimlarda darsga kelish taqiqlangan. 6-oktabrdan boshlab shunga o‘xshash talablar o‘qituvchilarga ham tatbiq etilgan.

12-oktabr kuni maktablarda yangi qoidalarga rioya qilinishini tekshirish boshlangan. APA agentligi xabariga ko‘ra, talabga mos kiyinmagan holda kelgan o‘quvchilar bilan maktab shifokorlari va psixologlari ishtirokida suhbatlar o‘tkazilgan. Ularning ota-onalari ham tushuntirish berish uchun maktabga taklif qilingan.

Hokimiyat vakillari diniy kiyimlarga qo‘yilgan cheklovlarni o‘quvchilar o‘rtasida tenglikni ta’minlash va ta’lim muassasalarida betaraf muhitni saqlash zarurati bilan izohlamoqda.

Parlament deputati Sevinj Fatalieva maktab formasining yagona bo‘lishi bolalar o‘rtasidagi ijtimoiy va diniy farqlarni kamaytirishga xizmat qilishini ta’kidlagan. Uning fikricha, forma talablari diniy e’tiqodga qarshi kurash emas, balki ta’lim muhitining betarafligini himoya qilish chorasi sifatida ko‘rilishi kerak.