Чорвоқдаги курортни қуриш учун Эмин Агаларов Ўзбекистонга таклиф қилинган — Экология вазири

23 июль куни бўлиб ўтган матбуот анжуманида экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов озарбайжонлик тадбиркор Эмин Агаларовнинг Чорвоқ сув омбори соҳилида Sea Breeze Uzbekistan лойиҳасини амалга ошириш эҳтимоли бўйича Ўзбекистонга таклиф қилинганига изоҳ берди.

 

“Республикага таклиф этилган девелопер ўзидан-ўзи келиб унақа қилмаяпти бу ерда. Келиб, ўзидан-ўзи „Мана, мен шу Чорвоқда қураман“, деган гап йўқ. У, аксинча, тажрибали бўлганлиги учун, у жуда ҳам бир экологик стандартларга жавоб берадиган қурилишларни қилганлиги учун ҳам Ўзбекистонга таклиф этиляпти. Бўлмасам, ўзининг жуда унақа бир катта хоҳиши йўқ, унинг мингта таклифи бор”, — таъкидлади вазир.

Унинг сўзларига кўра,  Agalarov Development компанияси раҳбарига минтақанинг бошқа давлатлари ва Европа ҳам қизиқиш билдирмоқда.

“Ҳозир, мана, ким эшитган бўлса, уни Қирғизистон ҳам чақиряпти, Қозоғистонда ҳам унинг таклифлари бор, Туркияда мана жуда катта лойиҳаларни амалга оширяпти. Ҳозир мана Черногорияга бориб қиламан, деяпти”, — дея қўшимча қилди Азиз Абдуҳакимов.

Эслатиб ўтамиз, Чорвоқдаги бундай катта ҳажмдаги курортни қуриш Тошкент шаҳрининг асосий сув манбаи бўлган “Чорвоқ” сув омборидаги сувнинг заҳарланиши ва бошқа экологик омилларни келтириб чиқариш мумкин.