BBC 2000 tagacha ish o‘rnini qisqartiradi

Chorshanba kuni BBC yaqin ikki yil ichida 2000 tagacha ish o‘rnini qisqartirishni rejalashtirayotganini ma’lum qildi.

Vaqtinchalik bosh direktor Rodri  Talfan Devisning AFP axborot agentligiga bergan bayonotida qisqartirishlar BBCning “jiddiy moliyaviy bosimlarga duch kelayotgani va ularga zudlik bilan chora ko‘rish zarurati” tufayli yuzaga kelganini ta’kidladi.

Uning so‘zlariga ko‘ra, tashkilot o‘zining 5,7 milliard yevro miqdoridagi operatsion xarajatlaridan 575 million yevro qisqartirishi kerak. Tejamkorlik choralarining asosiy qismi 2027 va 2028-yillarga to‘g‘ri keladi.

Bu teleradiokompaniyadagi so‘nggi 15 yildagi eng yirik ish o‘rinlari qisqarishi bo‘ladi.

BBC sun’iy intellekt va foydalanuvchilar odatlarining o‘zgarishi tufayli beqarorlashib borayotgan media muhitida  ish o‘rinlarini qisqartirmoqda.

AQSh prezidenti Donald Tramp telekanalni 10 milliard dollar (8,4 milliard yevro) miqdorida tuhmatda ayblab, sudga berdi. Bunga telekanal efirga uzatgan hujjatli filmda uning 2021-yil AQSh Kapitoliysidagi g‘alayonlar oldidan so‘zlagan nutqi o‘zgartirilgani, go‘yoki u o‘z tarafdorlarini Kongress binosiga hujum qilishga ochiqdan-ochiq da’vat etgandek ko‘rsatilgani sabab bo‘lgan.

Kelasi oydan boshlab BBCda Google’ning sobiq rahbari Mett Brittin yangi bosh direktor bo‘lib ish boshlaydi. Uning tayinlanishi korporatsiyani transformatsiya davridan olib o‘tish vazifasi bilan bog‘liq.

BBC kontentni ko‘rish yoki tinglash uchun litsenziya sotib oladigan aholi mablag‘lari hisobidan moliyalashtiriladi. 

Tashkilot ma’lumotlariga ko‘ra, Buyuk Britaniyadagi voyaga yetgan aholining 94 foizi har oy uning xizmatlaridan foydalanadi.

Mart oyidagi hisobotida BBC litsenziya to‘lovlaridan tushgan daromadi 2017-yildan buyon 24 foizga kamayganini ma’lum qilgan.

“Litsenziya to‘lovlari bilan bog‘liq qiyinchiliklar va boshqa bosimlar tufayli 2029-yil mart oyiga qadar umumiy xarajatlarimizni 10 foizga kamaytirishimiz zarur”, — deyiladi hisobotda va bu murakkab tanlov natijasida kontent va xizmatlar ham qisqarish ehtimoli aytib o‘tilgan.