Эронлик Нобел мукофоти совриндори Наргес Муҳаммадий ўлим ёқасида

5 май куни Эронда қамоқда сақланаётган Наргес Муҳаммадийни қўллаб-қувватлаш қўмитаси унинг “ҳаёт ва ўлим ўртасида” эканини маълум қилди.

Муҳаммадийнинг соғлиғи ёмонлашганидан яқинлари жиддий хавотирда.

Ҳозирда 50 ёшдан ошган Муҳаммадий Эронда аёллар ҳуқуқлари ва ўлим жазосини бекор қилиш йўлидаги кураши учун ҳибсда сақланаётган пайтида 2023-йилги Тинчлик бўйича Нобел мукофотига сазовор бўлган эди.

Оила аъзоларининг айтишича, март ойи охирида юрак хуружи гумони билан касалхонага ётқизилган фаолнинг аҳволи 1 май куни кескин оғирлашгач, Эрон шимоли-ғарбидаги шифохонага олиб кетилган.

“Биз фақат Наргеснинг озодлиги учунгина эмас, балки унинг юраги уриб туриши учун ҳам курашяпмиз”, – деди унинг Париждаги адвокати Ширин Ардаконий ўз тарафдорлари учун ўтказилган матбуот анжуманида.

Сўнгги йигирма йилнинг аксар қисмини фаоллиги туфайли қамоқда ўтказган Муҳаммадий охирги марта декабрь ойида бир адвокатнинг дафн маросимида Ислом Республикасини қоралагани учун ҳибсга олинган эди.

"Муҳаммадийнинг соғлиғи тобора даражада ёмонлашиб бормоқда. Биз Наргеснинг ҳаёти учун ҳеч қачон бунчалик хавотир олмаганмиз, у ҳар он бизни тарк этиши мумкин," — деди Ардаконий.

Муҳаммадий қамоқда 20 килограмм вазн йўқотган, нутқи оғирлашган ва ҳозирги аҳволи сўнгги ҳибсидан олдинги ҳолатига нисбатан “таниб бўлмас” даражада ўзгарган.

Унинг тарафдорлари Муҳаммадийнинг шахсий шифокорлар гуруҳи назоратида даволаниши учун Теҳронга ўтказилишини истайди, бироқ, афтидан, уни Занжондан кўчиришмайдиганга ўхшаяпти.

Муҳаммадийнинг ўсмир ёшидаги эгизак фарзандлари ва турмуш ўртоғи Парижда яшайди. Адвокат Ардаконий Франция Ташқи ишлар вазирлиги ва президент Эммануэл Макронни унинг иши юзасидан қатъийроқ позицияни эгаллашга чақирди.

Муаллиф: Исомиддин Жуманазаров