Eronlik Nobel mukofoti sovrindori Narges Muhammadiy o‘lim yoqasida

5-may kuni Eronda qamoqda saqlanayotgan Narges Muhammadiyni qo‘llab-quvvatlash qo‘mitasi uning “hayot va o‘lim o‘rtasida” ekanini ma’lum qildi.

Muhammadiyning sog‘lig‘i yomonlashganidan yaqinlari jiddiy xavotirda.

Hozirda 50 yoshdan oshgan Muhammadiy Eronda ayollar huquqlari va o‘lim jazosini bekor qilish yo‘lidagi kurashi uchun hibsda saqlanayotgan paytida 2023-yilgi Tinchlik bo‘yicha Nobel mukofotiga sazovor bo‘lgan edi.

Oila a’zolarining aytishicha, mart oyi oxirida yurak xuruji gumoni bilan kasalxonaga yotqizilgan faolning ahvoli 1-may kuni keskin og‘irlashgach, Eron shimoli-g‘arbidagi shifoxonaga olib ketilgan.

“Biz faqat Nargesning ozodligi uchungina emas, balki uning yuragi urib turishi uchun ham kurashyapmiz”, – dedi uning Parijdagi advokati Shirin Ardakoniy o‘z tarafdorlari uchun o‘tkazilgan matbuot anjumanida.

So‘nggi yigirma yilning aksar qismini faolligi tufayli qamoqda o‘tkazgan Muhammadiy oxirgi marta dekabr oyida bir advokatning dafn marosimida Islom Respublikasini qoralagani uchun hibsga olingan edi.

"Muhammadiyning sog‘lig‘i tobora darajada yomonlashib bormoqda. Biz Nargesning hayoti uchun hech qachon bunchalik xavotir olmaganmiz, u har on bizni tark etishi mumkin," — dedi Ardakoniy.

Muhammadiy qamoqda 20 kilogramm vazn yo‘qotgan, nutqi og‘irlashgan va hozirgi ahvoli so‘nggi hibsidan oldingi holatiga nisbatan “tanib bo‘lmas” darajada o‘zgargan.

Uning tarafdorlari Muhammadiyning shaxsiy shifokorlar guruhi nazoratida davolanishi uchun Tehronga o‘tkazilishini istaydi, biroq, aftidan, uni Zanjondan ko‘chirishmaydiganga o‘xshayapti.

Muhammadiyning o‘smir yoshidagi egizak farzandlari va turmush o‘rtog‘i Parijda yashaydi. Advokat Ardakoniy Fransiya Tashqi ishlar vazirligi va prezident Emmanuel Makronni uning ishi yuzasidan qat’iyroq pozitsiyani egallashga chaqirdi.

Muallif: Isomiddin Jumanazarov