Куба дронларини шай ҳолатга келтирди: АҚШ янги “Кариб инқирози”дан хавотирда

“Axios” нашрининг АҚШ разведкаси ва Оқ уйдаги манбаларига таяниб хабар беришича, ушбу масала Вашингтонда махфий даражада муҳокама қилинмоқда.

Разведка маълумотларига кўра, Куба ҳозирда 300 дан ортиқ ҳарбий дронларни тайёр ҳолатга келтирган. Ҳисоботларда улардан АҚШ объектларига эҳтимолий зарба бериш сценарийлари ҳам кўриб чиқилаётгани айтилган.

Эҳтимолий нишонлар қаторида АҚШнинг Гуантанамодаги ҳарбий базаси, Кариб денгизидаги ҳарбий кемалари ҳамда Флорида штатида жойлашган Ки-Уэст шаҳри тилга олинмоқда. Ушбу ҳудуд Куба қирғоқларидан тахминан 145 километр узоқликда жойлашган.

Вашингтонни айниқса Гаванада Эрон ҳарбий маслаҳатчиларининг пайдо бўлгани ташвишга солмоқда. Оқ уй Куба ҳудуди Россия ёки Эроннинг ғарбий ярим шардаги ҳарбий плацдармига айланиб қолишидан хавотир билдирмоқда.

АҚШ маъмуриятининг юқори мартабали амалдорларидан бирига кўра, бундай технологияларнинг АҚШ чегараси яқинида пайдо бўлиши жиддий хавф ҳисобланади.

Маълумотларга кўра, инқироз фонида АҚШ Марказий разведка бошқармаси директори Жон Рэтклифф Гаванага кутилмаган ташриф билан борган. У Куба раҳбарияти билан учрашиб, Вашингтонга қарши ҳарбий ҳаракатлар ва АҚШ рақиблари билан яқинлашув оқибатлари ҳақида огоҳлантирган.

Экспертлар ушбу вазиятни “Кариб инқирози”нинг замонавий кўриниши сифатида баҳоламоқда. Бу сафар ядровий ракеталар ўрнини зарбадор дронлар ва радиоэлектрон кураш тизимлари эгаллагани таъкидланмоқда.

Таҳлилчилар фикрича, ушбу разведка маълумотлари АҚШнинг Кубага нисбатан янги санкциялар жорий қилиши ва Кариб минтақасида ҳарбий ҳозирлигини кучайтиришига сабаб бўлиши мумкин.